EENDEKUIL – Joswin Owies (35) uit Eendekuil is in die Piketbergse landdroshof skuldig bevind aan daggahandel, nadat hy en ‘n 17-jarige seun in Augustus in Eendekuil in hegtenis geneem is.

Owies is skuldig bevind aan die oortreding van Artikel 3(b) van Wet 140 van 1992, naamlik die handel in dagga. Die saak is in die landdroshof op Piketberg verhoor.

Die hof het hom gevonnis tot ‘n boete van R4 000 of ses maande tronkstraf, en ‘n bykomende ses maande tronkstraf, uitgestel vir vier jaar, op voorwaarde dat hy nie weer skuldig bevind word aan die oortreding van Artikel 5(b) van Wet 140 van 1992 gedurende die uitsteltydperk nie.

Daarbenewens is die dagga, leë sakkies en twee weegskale verbeurd verklaar ten gunste van die staat.

Die nasionale direkteur van openbare vervolging het ook ‘n konfiskasiebevel ingevolge Artikel 18 van die Wet op die Voorkoming van Georganiseerde Misdaad (Wet 121 van 1998) teen Owies verkry.

Nicolaas Johannes van Zyl, adjunk-direkteur van openbare vervolging by die Eenheid vir Bateverbeurverklaring in die Wes-Kaap, het die aansoek op Maandag 7 September in Kaapstad gemagtig. Die bevel hou verband met enige voordeel wat Owies moontlik uit sy misdryf verkry het, en die partye het oor die kwessie ooreengekom.

Owies is boonop onbevoeg verklaar om vuurwapens te besit.

Die saak spruit voort uit ‘n suksesvolle teenmisdaad-optrede op Vrydagaand 21 Augustus in Eendekuil, waar dwelms tydens ‘n ondersoek na beweerde dwelmhandel in beslag geneem is.

Owies en ‘n 17-jarige seun het op Maandag 24 Augustus vir die eerste keer in die hof verskyn. Die tiener het na bewering dwelms aan ‘n voornemende koper verkoop en blykbaar erken dat die dwelms aan sy stiefpa behoort.

Die uitslag van die saak teen die 17-jarige seun is nie uit die beskikbare hofdokumente bekend nie.