VREDENDAL – ’n Langdurige ondersoek deur ’n Vredendal-polisieondersoekbeampte het Woensdag 12 Augustus gelei tot die skuldigbevinding van een van drie beskuldigdes in ’n dwelmhandelsaak.

Jacky Bruno (33) is deur die Vredendal-landdroshof skuldig bevind aan die oortreding van Artikel 5(b) van Wet 140 van 1992, wat handel oor die handel in dwelms. AO Lynette Tubb was die ondersoekbeampte in die saak.

Drie beskuldigdes is in Januarie 2022 in hegtenis geneem nadat lede van die sigbare polisiëringseenheid van die Vredendal-polisie ’n voertuig in Aas le Fleurstraat, Vredendal-Noord, deursoek het.

Tydens die deursoeking is 401 mandrax-tablette en sewe sakkies tik aan die bestuurskant van die voertuig gevind.

Die saak het daarna deur ’n uitgebreide hofproses gegaan, met Tubb as die ondersoekbeampte.

Bruno is Woensdag tot ’n boete van R12 000 of, indien hy dit nie betaal nie, 12 maande direkte gevangenisstraf gevonnis. Hy is ook tot drie jaar se gevangenisstraf gevonnis, wat geheel en al vir vyf jaar opgeskort is.

Beskuldigde nommer drie is onskuldig bevind, terwyl die ondersoek teen beskuldigde nommer twee steeds voortduur.