SALDANHA – ’n Sakeman wat verlede week tydens ’n gewapende roof in Summer Greens, Kaapstad, ontvoer is, is Maandagaand (1 Junie) in die Weskus gered nadat die Wes-Kaapse teen-ontvoeringstaakspan op twee huise in die dorp toegeslaan het.

Volgens polisiewoordvoerder brig. Novela Potelwa is die 51-jarige man verlede Maandag (25 Mei) ontvoer nadat sewe gewapende verdagtes glo ’n huis in die Summer Greens-buurt binnegeval en die inwoners van selfone en ’n groot bedrag kontant beroof het.

Die ondersoek het die taakspan, bestaande uit speurders, intelligensie-operateurs en lede van die spesiale taakmag, eers na Khayelitsha gelei waar vyf verdagtes Vrydagaand (29 Mei) in Makhaza in hegtenis geneem is.

Verdere inligting het die span daarna na Diazville, Saldanha, geneem. Die eerste arrestasie in die dorp is in Basil Februarystraat uitgevoer. Kort daarna het die span op nog ’n woning in Noordsestraat toegeslaan waar die ontvoerde sakeman gevind en gered is.

Volgens die polisie was die man vasgebind en het hy beserings gehad wat vermoedelik deur marteling veroorsaak is. Hy is na ’n mediese fasiliteit geneem vir behandeling.

Altesaam nege verdagtes, sewe mans en twee vroue tussen 20 en 50 jaar oud, is in verband met die saak in hegtenis geneem.

Hulle sal na verwagting Woensdag 3 Junie in die Kaapstadse landdroshof verskyn op aanklagte van roof, ontvoering, afpersing, asook die besit van gesteelde eiendom, vuurwapens en ammunisie.

Die Wes-Kaapse polisiebestuur het die teenontvoeringstaakspan geloof vir die ondersoek wat tot die redding van die gyselaar en die arrestasies gelei het.