KIMBERLEY – Met die opening van ‘n volwaardige Mugg & Bean in die Mediclinic Gariep in Kimberley het ‘n besoek aan dié hospitaal ‘n ander dimensie aangeneem.

Mugg & Bean Mediclinic Gariep het op Donderdag 3 September amptelik geopen. Dit is die tweede Mugg & Bean in Suid-Afrika om in ‘n Mediclinic oop te maak, en die eerste in ‘n Mediclinic in die Noord-Kaap en Vrystaat.

Dié verrykende toevoeging tot die hospitaalomgewing beteken meer as net die beskikbaarheid van ‘n gerieflike restaurant waar Mugg & Bean se staatmakerspyskaart met onder meer topgehalte-koffie, varsgebakte lekkernye en gesonde etes in ‘n stylvolle agtergrond voorgesit word.

Mugg & Bean Mediclinic Gariep is ‘n ideale plek vir familie en vriende om tydens ‘n hospitaalbesoek of wagtydperk vir mediese toetsing asem te skep sonder dat dit nodig is om die hospitaalterrein te verlaat.

Boonop, omdat Mugg & Bean Mediclinic in ‘n veilige omgewing met volop parkering geleë is, is dit ‘n ideale bymekaarkomplek vir ouer persone of vroue wat rustig, sonder die bedrywighede van ‘n winkelsentrum om hulle, wil kuier – hetsy dit vir ‘n vroeë ontbyt of ‘n vroeë aandete is, of ‘n rustige kuier op weeksdae of oor naweke.

Bekende spyskaart, met wegneemetes

“Die spyskaart by Mugg & Bean Mediclinic Gariep stem grootliks met dié by die ander takke ooreen – sonder die Hearty & Generous-afdeling – en sluit ook ‘n On the Move-element met gerieflike keuses vir wegneemetes in,” sê dr. Alf Bennett, eienaar.

Benewens die restaurant-gedeelte met 36 sitplekke het Mugg & Bean Mediclinic Gariep ook ‘n kiosk waar onder meer lekkergoed, koeldrank, water en ander snoepgoed, asook geskenke en benodigdhede soos seep, sjampoe, tandeborsels en tandepaste, gekoop kan word.

‘n Trolliediens word in die hospitaalsale aangebied.

Die vestiging van dié restaurant het tot ongeveer 15 nuwe werksgeleenthede gelei.

• Besoek Mugg & Bean Mediclinic Gariep op weeksdae van 07:00 tot 19:45 en naweke van 08:00 tot 18:45.