VELDDRIF – Pienk uitrustings, glimlagte en ‘n gesamentlike doel het die afgelope Saterdag (10 Oktober) die toon aangegee toe sowat 250 deelnemers by Laaiplek se Spar en apteek vir ‘n 5 km-stap en -draf ter ondersteuning van borskankerbewustheid byeengekom het.
Die geleentheid, wat in Oktober se Borskankerbewustheidsmaand plaasgevind het, het deelnemers van verskillende ouderdomme byeengebring om hul steun aan dié belangrike saak te betoon.
Van pienk tutu’s en T-hemde tot kleurvolle uitrustings en selfs opblaaskostuums deelnemers het met geesdrif aan die geleentheid deelgeneem en gewys dat bewustheid ook met ‘n gesonde dosis pret gepaard kan gaan.
Die roete het by die Laaiplek-apteek begin en deelnemers deur die strate van Velddrif en Port Owen geneem voordat hulle weer by die sentrum bymekaargekom het.
Gemeenskap maak ‘n groot verskil
Elke deelnemer het ná afloop van die stap of draf ‘n geskenkpakkie ontvang.
Johan Moolman van die Laaiplek-apteek het almal bedank vir hul deelname en bereidwilligheid om die goeie doel te ondersteun. Die geld wat met die geleent- heid ingesamel is, sal vir borskankerbewustheid geskenk word.
Moolman het ook die belangrikheid van gereelde ondersoeke beklemtoon en deelnemers aangemoedig om bewus te wees van hul borsgesondheid.
Volgens die Kankervereniging van Suid-Afrika (Kansa) is borskanker die algemeenste kanker onder vroue in Suid-Afrika. Vroeë opsporing is belang- rik, aangesien dit die kans op doeltreffende behandeling kan verbeter.
Kansa moedig vroue aan om hul borste gereeld te ondersoek en op veranderinge te let, waaronder knoppe, veranderinge in die vorm of grootte van die borste, velkuiltjies, tepelveranderinge of ongewone afskeiding.
Enige verdagte verandering behoort deur ‘n gesondheidswerker ondersoek te word. Gereelde kliniese ondersoeke en toepaslike sifting is ook belangrik.
Die organisasie bied inligting oor borskanker, vroeë opsporing en ondersteuningsdienste. Meer inligting is op Kansa se webtuiste beskikbaar.
Die boodskap van Saterdag se geleentheid was duidelik: deur saam te staan, bewustheid te bevorder en geld in te samel, kan gemeenskappe help om die stryd teen borskanker te ondersteun.
LEES OOK: Shavathon bring Weskus saam
