SALDANHA – Meer as twee jaar nadat die sesjarige Joshlin Smith spoorloos uit die Middelpost-informele nedersetting in Saldanha verdwyn het, het ’n Kaapstad-gebaseerde aktivis ’n beroep op die polisie en gemeenskap gedoen om saam te werk en moontlike nuwe leidrade deeglik te ondersoek.

Ds. June Dolley-Major het Donderdag tydens ’n mediasessie besonderhede bekend gemaak oor verskeie items wat volgens haar tydens soektogte in die duine gevind en vir moontlike forensiese ontleding voorgelê is.

Joshlin is op Maandag 19 Februarie 2024 by die Saldanha-polisiekantoor as vermis aangemeld. Sy is daardie oggend laas in Middelpos, langs Diazville, gesien.

Volgens Dolley-Major het soekspanne herhaaldelik na dieselfde gebied in die duine teruggekeer nadat verskeie items daar gevind is.

Dit sluit onder meer ’n trui, ’n mans-T-hemp wat volgens haar aan Boeta behoort, ’n duvet-oortreksel en ’n houtstomp in wat moontlik van Kelly Smith se vloerplank afkomstig is.
Sy sê sommige van die items het tekens getoon wat soos bloedspatsels gelyk het.

“Ek het rekord gehou. Ek het aangeteken wat gevind is, die datum waarop dit gevind is, wie dit gevind het en wie dit geverifieer het,” het Dolley-Major gesê.

Sy sê sommige items is ongeveer kniediep onder die grond gevind, met groot betonblokke bo-op.

DNA-leidrade

Dolley-Major het ook verwys na ’n klein stukkie geel lint wat dae voor die aanvang van die verhoor in Maart 2025 gevind is.
Volgens haar het Joshlin se skool geel linte gebruik en is die lint aan die forensiese ondersoeker Danie Krugel oorhandig.
“Hy het Joshlin se DNA daarop opgespoor. Die polisie het die lint,” het sy gesê.

Sy beweer verder dat ’n stuk spons- of matrasmateriaal waarop daar tekens van bloed was, ook vir Joshlin se DNA getoets is en dat haar DNA daarop opgespoor is.
Volgens Dolley-Major het ’n opgeleide kadawerhond reguit na die materiaal beweeg toe dit in ’n openbare area geplaas is.
Sy het egter beklemtoon dat nie alle items wat gevind is, positief vir Joshlin se DNA getoets het nie.

“Op baie van die items is Joshlin se DNA nie opgespoor nie. Ek wil dit duidelik stel,” het sy gesê.
Nog items, waaronder vroueklere en drie plastieksakke, is volgens haar ook gevind en getoets. Dolley-Major sê twee van die sakke het positief vir Joshlin se DNA getoets.
Sy sê die items is op 26 Junie 2026 deur twee polisielede by Krugel afgehaal nadat toetse in hul teenwoordigheid uitgevoer is.

LEES OOK: Eer aan Joshlin se ondersoekspan

Polisie reageer

Kol. André Traut, Wes-Kaapse polisiewoordvoerder, sê die polisie is bewus van die groot openbare belangstelling rondom Joshlin se verdwyning.

“Van die begin van die ondersoek af het die polisie ’n beroep op lede van die publiek gedoen vir inligting wat kan help om Joshlin op te spoor. Elke stukkie inligting wat ontvang is, ongeag die bron, is beoordeel en waar nodig as deel van die ondersoek opgevolg,” het Traut gesê.

Hoewel skuldigbevindings in verband met die saak verkry is, duur pogings om Joshlin op te spoor voort.

“Die ondersoek is nie afgehandel nie,” het Traut gesê.

Hy sê die polisie lewer oor die algemeen nie kommentaar op verklarings of menings van persone buite die ondersoek nie.

LEES OOK: Polisie waarsku teen ongeverifieerde plasings oor Joshlin Smith

“Inligting wat bewyswaarde kan hê, word deur ondersoekers deur gevestigde ondersoekprosesse beoordeel om die relevansie en geloofwaardigheid daarvan te bepaal,” het hy gesê.

Volgens Traut bly die prioriteit om Joshlin te vind en antwoorde aan haar familie te verskaf.

Dolley-Major sê borge het aangebied om vir ’n TLB, ’n opgeleide kadawerhond en verdere forensiese toetse by plaaslike en internasionale private laboratoriums te betaal.

“Ons wil nie die werk van die polisie doen nie. Ons wil eenvoudig help waar ons kan,” het sy gesê.

Met Joshlin se negende verjaardag wat volgende maand aanbreek, sê Dolley-Major sal die soektog voortgaan.

“Sou dit nie goed wees as daar teen daardie tyd antwoorde kon wees nie?” het sy gevra.