VREDENBURG – Misdaad raak almal. Dit kan inbrake, motordiefstal, dwelms of geweld wees. Geen buurt is heeltemal veilig teen misdaad nie, maar inwoners kan help om hul buurt veiliger te maak deur by die plaaslike Gemeenskapspolisiëringsforum (GPF) in die Weskus betrokke te raak.

Wat is ‘n GPF?

‘n GPF is ‘n groep mense uit die gemeenskap wat saam met die polisie werk om misdaad te bekamp en die buurt veiliger te maak. Die groep bestaan uit inwoners, die plaaslike polisie, lede van die verskillende buurtwagte in die dorp en ander mense, wat almal ‘n rol in die gemeenskap vervul. Dit kan skole, sakeondernemings en munisipale werkers insluit.

Die doel is eenvoudig: Die gemeenskap en die polisie moet saamwerk.

GPF’s is belangrik omdat die polisie nie deurentyd oral kan wees nie. Hulle het die hulp van inwoners nodig. Inwoners kan by GPF-vergade­rings direk met die polisie oor probleme in hul buurt praat.

Is daar ‘n donker straat waar mense gereeld aangeval word? Is daar ‘n verlate gebou waar dwelms verkoop word? Is daar ‘n plek waar mense gereeld beroof word?

Vertel die polisie by ‘n GPF-vergadering daarvan.

Die polisie vertel weer op hul beurt vir inwoners meer oor watter misdaad in die dorp voorkom en waarvoor mense moet oppas. Jy kan ook vrae vra en veilig­heidswenke kry.

GPF bring regte mense byeen

Sommige probleme kan nie net deur die polisie opgelos word nie. As straatligte nie werk nie, moet die munisipaliteit dalk help. As ‘n verlate gebou ‘n probleem is, moet ander mense of departemente dalk betrek word. ‘n GPF bring die regte mense bymekaar om oor sulke probleme te praat.

GPF’s kan saam met die polisie en inwoners planne maak om misdaad te voorkom. Dit kan byvoorbeeld veiligheidsveldtogte, buurtpatrollies of programme vir jongmense insluit.

Hoe meer inwoners betrokke is, hoe beter verstaan die GPF die probleme in die gemeenskap. Inwoners kry ook die geleentheid om vrae te vra en probleme aan te meld.

Maak ‘n verskil

Die polisie het die gemeen­skap se hulp nodig. Inwoners weet dikwels wat in hul eie strate gebeur omdat hulle daar woon en werk.

Deur by ‘n GPF betrokke te raak, kan jy help om ­probleme uit te wys en saam met ander oplossings te soek.

Vind uit wanneer jou plaaslike GPF vergader en woon die vergadering by. Sluit aan by jou veiligheids- of buurtwag. Bring probleme én moontlike oplossings na die vergadering.

• Die Vredenburg GPF verga­der op Donderdag 8 Oktober by die sportterrein om 18:00.

LEES OOK: Polisie se ombudsman het nou kantoor in die Weskus