ATLANTIS – Die bekende plaaslike sangeres Nikita Scott is een van 17 vroue uit die Wes-Kaap wat deel is van die internasionaal bekroonde Bold Beauty Project se eerste Afrika-uitstalling, wat hierdie maand in Kaapstad open.
Die fotografie-uitstalling, “As She Is”, word tot 29 Augustus by 33BREE, in samewerking met The Artists Gallery aangebied. Die projek, wat in die Verenigde State ontstaan het, het reeds wêreldwyeerkenning ontvang vir sy gebruik van fotografie en persoonlike stories om persepsies oor gestremdheid, skoonheid en insluiting uit te daag.
Die projek vir die eerste Afrika-weergawe is spesiaal vir die Wes-Kaap herontwerp. Sewentien vroue wat met gestremdhede leef, is deur bekende Suid-Afrikaanse fotograwe afgeneem. Elke grootformaatportret word aangevul deur die vrou se eie verhaal, wat besoekers ‘n blik gee op haar identiteit, persoonlikheid en lewenservaring.
Scott, wat ‘n rolstoel gebruik, word saam met onder andere Danilene Swarts van Mamre uitgebeeld. Swarts, wat gehoorgestremd is, dien as tesourier van die Lief en Leed-organisasie vir Mense met gestremdhede. Ook deel van die uitstalling is dr. Marlene le Roux, uitvoerende hoof van Artscape en ‘n bekende kampvegter vir die regte van mense met gestremdhede.
PROJEK EGTER NIÉ OOR GESTREMDHEID NIE
Volgens Jaret Loggenberg, die besturende direkteur van The Artists Gallery en 33BREE, gaan die projek nie oor gestremdheid nie, maar oor sigbaarheid, waardigheid en die viering van buitengewone vroue presies soos hulle is.
“Ons is geëerd om hierdie internasionaal erkende projek die eerste keer na Suid-Afrika te bring. Ons hoop die uitstalling sal gesprekke oor insluiting en verteenwoordiging inspireer tot lank nadat besoekers die galery verlaat het,” sê hy.
Le Roux, wat as medekurator en mentor aan die Wes-Kaapse projek gewerk het, sê mense met gestremdhede moet nooit as probleme beskou of onsigbaar gemaak word nie.
“Hierdie projek gaan oor krag, selfaanvaarding en die moed om jouself ten volle te omhels. Dit sê eenvoudig: ‘Kyk na haar. Sien wie sy is, net soos sy is’,” sê Le Roux.
Die Bold Beauty Project is in die VSA deur Shelly Baer en dr. Eva Ritvo gestig en het sedertdien in verskeie lande uitgestal. Die jongste internasionale mylpaal was die projek se deelname aan die 61ste Venesië-biënnale, waar dit as deel van die gesogte Personal Structures – Confluences-uitstalling by Palazzo Mora vertoon is. Meer as 150 kunstenaars uit meer as 40 lande het aan dié uitstalling deelgeneem.
Volgens die organiseerders wys die Wes-Kaapse weergawe hoe die universele taal van fotografie kulture kan oorbrug en ‘n stem aan mense, wat dikwels nie gesien of gehoor word nie, kan gee.
Die uitstalling is deel van die HEAT Arts Festival en toegang is gratis.
Besoekers kan die uitstalling by 33 Bree Street in Kaapstad tot 29 Augustus besoek.
Daarmee word nie net die talent van Suid-Afrikaanse fotograwe uitgelig nie, maar ook die buitengewone verhale van vroue wat daagliks bewys dat ware skoonheid, moed en waardigheid geen beperking ken nie.
