In ‘n wêreld waar woorde dikwels as ‘n maklike vorm van terapie beskou word, is die stories van twee vroue van Atlantis en die Kaapse Vlakte ‘n kragtige herinnering aan die moed wat dit kos om ‘n stem te vind.

Julie Daniels en Anna ­Seherie, twee vroue met verskillende pyn, het hul hartseer in boekvorm omgeskep. Hul reise gaan nie net oor skryf nie, maar oor oorlewing, geloof en die krag van gemeenskappe wat mekaar ondersteun.

Die Wesfleur-Biblioteek het dié twee vroue as deel van Vrouemaand genooi om hul ervarings en skryftalent met die Atlantis-gemeenskap te deel.

Julie Daniels: Die digter wat haar pyn in humor omgeskep het Julie Daniels se pad na skryfwerk het op die Kaapse Vlakte begin. In 2020, tydens die covid-pandemie, het sy haar man aan die virus verloor terwyl sy self ook siek geword het. ‘n Week ná haar man se dood is kanker by haar gediagnoseer. Sy het ook weens dubbele longontsteking twee en ‘n half dae in die waakeenheid deurgebring.

“Ek het nie verwag ek het skryftalent nie,” erken Daniels. “Ek het eintlik net probeer om my pyn neer te skryf. Dit was my manier om asem te haal en uiting te gee.”

Ná haar herstel het haar seun, Kyle Daniels, haar aangemoedig om haar gevoelens op papier vas te lê.

Vandag het Daniels sewe gepubliseerde boeke op haar naam, waaronder drie digbundels. In Gedigte van die Kaap weerspieël sy die lewe soos mense dit op die Kaapse Vlakte ken, maar met haar unieke Afri­kaanse humor. Een van haar bundels is deur die Nasionale Biblioteek gepubliseer.

Wat as ‘n manier begin het om haarself te genees, het ‘n loopbaan geword. Haar memoi­res word op 10 September be­kendgestel. “Soveel mense sit met pyn en dink hulle is verlore, maar met God aan ons sy is niks onmoontlik nie. Iets is in hulle weggesteek; hulle moet dit net ontdek,” sê sy.

Anna Seherie: Gedagtes, verlange en drome

Anna Seherie se verhaal begin met ‘n groot uitdaging: Sy kon nie lees of skryf nie.

Vir Seherie was haar man haar lewenslyn. Hy het haar gedagtes in woorde omgeskep en dit op papier vasgelê. Met die hulp van haar man en ‘n leerprogram het sy uiteindelik self begin skryf. “Dit was ‘n dramatiese stap vir my. Sonder die hulp van my man en ‘n leerprogram sou dit nie moontlik gewees het nie. Maar dit bewys dat niemand te laat is om hul stem te laat hoor nie, selfs al begin hulle met niks,” sê Seherie.

Haar boodskap aan die vroue van Atlantis is diep en spiri­tueel. “Onthou dat die genade van die Here my tot hier gedra het. Ons gaan deur baie ­moeilike dinge, donker tye en onsekerhede.

“Ons is egter nie verlore nie. Selfs in die diepste donkerte is daar ‘n plek wat ons kan bereik waar ons God se naam kan verheerlik,” sê sy.

Daniels en Seherie se boeke is meer as woorde op papier. Dit is getuienisse van die Atlantis- en Kaapse Vlakte-gemeenskappe en bewys dat pyn nie die einde van die storie hoef te wees nie, maar dikwels die begin van iets nuuts.

Daniels se memoires word op 10 September bekendgestel.

Seherie se boek is reeds beskikbaar.

• Kontak of besoek die Wesfleur-­biblioteek by die Wesfleur-­winkelsentrum vir nog inligting.