Waarskuwing: Hierdie berig bevat verwysings na seksuele misbruik van kinders en kan ontstellend wees vir sommige lesers.

ATLANTIS – ’n Ma wat op vier aanklagte van verkragting teregstaan, het Donderdag 16 Oktober tydens haar borgtogaansoek in die Atlantis-landdroshof volgehou dat die bewerings teen haar deel van ’n komplot is.

Sy sou glo nie haar kinders aansê om seksuele speletjies met haar te speel nie. “Ek glo nie vir ’n oomblik dat my kinders gesê het dat ek seksuele speletjies met hulle gespeel het nie, want dit is walglik,” het sy aan die hof gesê.

Die vrou het volgehou dat sy ’n sagte borsel gekoop het om haar kinders se beweerde wurmprobleem te behandel. Sy ontken egter dat sy die borsel in hul privaatdele ingedruk het, soos wat die kinders na bewering verklaar het.

Volgens die staat het ’n dokter wat die kinders vroeër ondersoek het, geen bewyse van ’n wurmprobleem gevind nie.

Die ma het emosioneel aan die hof gesê dat kliniekrekords kan bevestig dat sy haar kinders wel vir behandeling geneem het. “Ek was ongeveer vyf keer by die kliniek en het verskillende medikasie ontvang,” het sy getuig.

Die staatsaanklaer het ook verwys na ’n verklaring waarin die seun na bewering gesê het: “My ma het my penis wakker gemaak en in haar mond gesit.”

Die beskuldigde het dié bewering ten sterkste ontken en gesê sy glo nie dat haar seun dit gesê het nie.

Sy het verder getuig dat die kinders se pa en ouma in haar onskuld glo. Die pa sal na verwagting ook tydens die borgtogaansoek getuig.

Die staat het teen borgtog beswaar gemaak en aangevoer dat die beskuldigde moontlik toegang tot die kinders kan kry en die beweerde slagoffers kan beïnvloed indien sy vrygelaat word.

Die vrou het egter aan die hof gesê dat sy nie weer in aanhouding wil wees nie en niks sal doen om haarself in dié posisie te plaas nie.

Sy het ook die bewerings betwis dat haar kinders nooit ’n wurmprobleem gehad het nie. Volgens haar het haar suster, wat volgens die beskuldigde saam met haar en die kinders gewoon het, gelieg oor die beweerde probleem.

Die vrou het verder beweer dat haar suster haar en haar twee kinders mishandel het en dat dit een van die redes was waarom sy uit die situasie wou wegkom en verskeie skuilings om hulp genader het.

Tydens haar getuienis het sy verskeie verwysingsnommers voorgelees wat sy ontvang het toe sy maatskaplike werkers om hulp genader het. Sy het ook hulplynnommers genoem wat sy gebel het om bystand te kry.

Die beskuldigde het verder gesê dat sy verskeie polisiebeamptes by die ombudsman aangemeld het. Sy het ook verskeie e-posadresse aan die hof verskaf wat sy na uitgereik het.

Die borgtogaansoek duur vandag, 16 Oktober, voort.

LEES OOK: ‘Ek is moeg vir die lewe’, huil ma in hof oor ernstige bewerings teen haar