Terwyl die meeste hoërskoolleerders hul dae tussen boeke, toetse en sport verdeel, speel Eli Josias. ‘n leerder aan die Atlantis Senior Sekondêre Skool, ook ‘n ander rol – dié van junior kommissaris by die Atlantis-polisie.
Eli, ‘n trotse inwoner van Atlantis, is onlangs as deel van die polisie se Junior Kommissaris-program aangestel. Die program bied jong leiers die geleentheid om meer oor polisiëring, leierskap en gemeenskapsdiens te leer, terwyl hulle ook by veiligheids- en jeugprojekte betrokke raak.
Eli werk as deel van sy verantwoordelikhede saam met polisielede aan inisiatiewe wat skoolveiligheid, misdaadvoorkoming onder die jeug en gemeenskapsbetrokkenheid bevorder. Hy verteenwoordig ook die stem van jongmense by sekere gemeenskaps- en veiligheidsvergaderings.
“My hart is op twee plekke – in die klaskamer en in die gemeenskap,” sê Eli. “Omdat ek van Atlantis is en by Atlantis Senior Sekondêre Skool skoolgaan, verstaan ek die uitdagings waarmee jongmense daagliks te doen kry. Ek wil ‘n brug tussen leerders en die polisie bou en wys ons kan deel van die oplossing wees.”
Volgens die polisie fokus Eli se werk onder meer daarop om skoolveiligheid saam met onderwysers en polisielede te bevorder, jongmense aan te moedig om positiewe lewenskeuses te maak en ander leerders deur sy eie voorbeeld te inspireer.
Onderwysers, polisielede en gemeenskapsleiers beskryf hom as ‘n gedissiplineerde en toegewyde jong leier wat daarin slaag om sy akademiese verantwoordelikhede met gemeenskapsdiens te balanseer.
‘n Jong mens se ouderdom behoort nooit ‘n struikelblok vir leierskap te wees nie, het ‘n polisiewoordvoerder gesê. “Eli leer in die klaskamer, maar hy lei reeds in sy gemeenskap.”
Vir Eli is sy betrokkenheid by die program ‘n manier om iets terug te gee aan die gemeenskap waarin hy grootgeword het.
“Ek wil ‘n positiewe verskil maak en ander jongmense inspireer om ook betrokke te raak,” sê hy.
