Die Stad Kaapstad het sy jaarlikse teiken vir die vervanging van verouderde water- en rioolpype met meer as 40 kilometer oorskry, met gebiede in Atlantis wat vanjaar ook deel van die program was.
Die Stad se direktoraat vir water en sanitasie het in die 2025-’26-boekjaar bykans 193 km se water- en rioolpype reg deur die gebied vervang.
Die jaarlikse teiken was 150 km.
Waterpype is in Avondale en Saxonsea in Atlantis vervang. Avondale is in Maart en April by die werk ingesluit, terwyl waterpype in Saxonsea in Mei vervang is.
Die program is daarop gemik om verouderde infrastruktuur te vervang voordat dit breek en probleme veroorsaak. Volgens die Stad kan die proaktiewe vervanging van pype help om waterverliese te beperk, riooloorlope te voorkom en die betroubaarheid van die netwerk te verbeter.
Die vervangingswerk word volgens tegniese vereiste geprioritiseer, waaronder die ouderdom van en materiaal waarvan pype gemaak is, vorige breuke en die gevaar van infrastruktuuronderbreking.
Van die 193 km wat in die boekjaar vervang is, was 88,7 km waterpype teenoor die teiken van 50 km. Nog 104 km se rioolpype is vervang teenoor die geteikende 100 km.
Die Stad het in die laaste vier maande van die boekjaar alleen 40 991 meter waterpype en 66 992 meter rioolpype vervang. “Die vervanging van bykans 193 km se verouderde water- en rioolpype is ‘n groot prestasie, maar ons kan nie toelaat dat ‘n rekordjaar ‘n rede word om stadiger te werk nie,” het die raadslid Zahid Badroodien, die burgemeesterskomiteelid vir water en sanitasie, gesê.
Hy het gesê die Stad wil meer van die netwerk vervang voordat probleme ontstaan, eerder as om slegs op pypbreuke en ander infrastruktuurprobleme te reageer.
Die program sal in 2026-’27 voortgaan. Meer as R652 miljoen is vir die vervanging van verouderde water- en rioolpype reg oor Kaapstad begroot.
