Die Atlantis- spesiale ekonomiese sone (Asez) versterk steeds sy verbintenis tot jeugontwikkeling, vaardigheidsbevordering en inklusiewe deelname deur die Atlantis-gemeenskap tot geleenthede in wetenskap, tegnolo­gie, ingenieurswese en wiskunde (STEM), onderwys en die bedryfswêreld toegang te bied.

Asez het bedryfsleiers, opvoeders, leerders en ­studente op 27 Augustus 2026 vir sy Vroue in STEM- en sy uitnemendheidstoekennings byeengebring. Die geleentheid het vroue se prestasies in STEM gevier en jongmense aangemoedig om loopbane in hierdie belangrike rigtings te oorweeg.

Só werk stem-onderrig

Leerders van hoërskole in die Atlantis-gemeenskap het aan die geleentheid deelgeneem en hul kreatiwiteit en tegniese vaardighede deur ‘n boeiende robotikademonstrasie ten toon gestel.

Hul deelname het gewys hoe STEM-onderrig tot vernuwing, probleemoplossing en praktiese toepassings kan lei. Studente van West Coast College het ook die geleentheid bygewoon, wat die skakeling tussen onderwys, vaardigheidsontwikkeling en die bedryf verder versterk het.

‘n Hoogtepunt van die program was die hoofrede deur me. Beverley Links, die finansiële hoof by Atlantis Foundries, wat insigte oor STEM, uitnemendheid en die belangrikheid van die ontwikkeling van toekomstige talent gedeel het.

“Dit was besonder inspirerend om deel te wees van ‘n geleentheid wat vroue in STEM vereer en bemagtig,” het Links gesê.

Waheeda Saib, die finansiële hoof van Asez, het die belangrikheid van geleenthede waar jongmense met gevestigde professionele mense in gesprek kan tree, beklemtoon. “Asez se Vroue in STEM-geleentheid het met trots suksesvolle en inspirerende vroue met uitsonderlike leerders byeengebring.

Saam het ons die krag van mentorskap, die gees van bemagtiging en die blink toekoms van die volgende geslag STEM-leiers gevier,” het sy gesê.

Asez het op hierdie fokus voortgebou en op 2 September die 2026-Asez-loopbaanekspo by Atlantis City Mall aangebied. Die ekspo het leerders en gemeenskapslede in verbinding gebring met instellings wat studie-, oplei­dings- en loopbaangeleenthede bied.

Tersiëre verteenwoorigers ook daar

Verteenwoordigers van onder meer die Universiteit Stellenbosch, die Universiteit van Suid-Afrika, West Coast TVET College, SA Maritime School and Transport College, SAE Institute South Africa, Capsicum Culinary Studio, Swift Skills Academy en South African Law School het aan die ekspo deelgeneem.

Deur inisiatiewe soos hierdie versterk Asez steeds die bande tussen onderwys, die bedryf en die plaaslike gemeenskap.

Deur jongmense aan STEM bekend te stel en die gemeenskap toegang tot vaardigheidsontwikkeling en loopbaangeleenthede te bied, ondersteun Asez die ontwikkeling van ‘n geskoolde arbeidsmag wat vir die toekoms toegerus is.

Terselfdertyd inspireer ons die volgende geslag om hul ambisies na te streef.

LEES OOK: ASEZ stages second Careers Expo