Die afrigter van die eerste meisieshokkiespan van die Hoërskool Witteberg in Bethlehem het onlangs haar naam verder in uithousport gevestig toe sy haar tweede opeenvolgende Comrades-ultramarathon suksesvol voltooi het.

Die wêreldbekende ultramarathon, wat vanjaar op 14 Junie tussen Durban en Pietermaritzburg beslis is, het deelnemers oor 85,77 km geneem.

Marjulyn Myburgh het die veeleisende wedloop in ‘n indrukwekkende tyd van 11 uur en 34 minute voltooi en sodoende haar “Back-to-back”-prestasie behaal.

Boonop het sy die grootste deel van die wedloop met ‘n kniebesering afgelê.

“Vanjaar se wedloop was vir my makliker as my eerste Comrades, hoewel dit steeds uitdagend was. Die grootste uitdaging was om met ‘n kniebesering vir bykans 60 km aan te hou hardloop,” sê Myburgh.

LEES OOK: From kidney donor to green number: Kuils River’s Cheryl conquers 10th Comrades

As lid van die Bethlehem-marathonklub het sy groot waardering vir die ondersteuning wat sy langs die roete ontvang het.

Die ondersteuningspunt van die klub by die halfpadmerk het volgens Myburgh haar nuwe moed gegee toe die kilometers taai geraak het. Sy skryf haar sukses ook toe aan die sterk ondersteuningsnetwerk van familie, vriende en mede-atlete wat haar deurentyd aangemoedig het.

Myburgh het vanjaar ook die Twee Oseane-marathon voltooi.

Hoewel atlete gewoonlik sowat 800 km se voorbereiding vir die Comrades doen, het sy die wedloop suksesvol voltooi nadat sy net 486 km ter voorbereiding afgelê het.

LEES OOK: The Comrades Marathon: A legacy of endurance, camaraderie and triumph of the human spirit

Die jong afrigter, wat op ‘n plaas buite Bethlehem woon, is benewens ‘n toegewyde atleet ‘n perderuiter wat gereeld aan uithouritte deelneem.

Haar mees onlangse prestasie getuig van uitsonderlike deursettingsvermoë, dissipline en vasberadenheid – eienskappe wat haar toenemend ‘n inspirasie vir haar spelers en die breër gemeenskap van Bethlehem laat word.