Saterdag se spannende en taai kragmeting in die Dicky Jacobs-stadion in Upington tussen die tuisspan Upington City en Hungry Lions van Postmasburg het gelykop met 0-0 geeïndig.

Hungry Lions het uit die staanspoor met mening aangeval, maar Upington City se rotsvaste verdediging was deurslaggewend in hierdie belangrike Motsepe Foundation Championship-kragmeting.

Op die verdediging het Upington City se kaptein Givemore Khupe geskitter. Dié ligblouspan se doelwagter Abram Ngcobo het verskeie gevaarlike aanslae op sy doelhok met asemrowende keerwerk gestuit en sodoende het hulle Hungry Lions se gevaarlike doelskieters gefnuik.

Hungry Lions bevind hul in die gesamentlike derde posisie met Cape Town City op die Motsepe-puntelys met 48 punte ná afloop van Saterdag se gelykopuitslag teen Upington City.

Milford FC het sy wedstryd Saterdag teen Cape Town City gewen terwyl Kruger United FC die span van Black Leopards met 3-1 getroef het om deur te dring na die premiersokkerliga (PSL).

Upington City, met 38 punte in die sak, moet nog twee wedstryde speel en is tot sover nog veilig om die relegasiespook te ontwyk. Die span het Saterdag ‘n punt bygekry vir sy gelykopuitslag teen Hungry Lions.

LEES OOK: Motsepe-reeks | Hungry Lions honger na sukses, kelder Pretoria Amatuks