Die krieketklubs, Upington Lions en Kenhardt, was Saterdag 24 Oktober in ‘n eendagstryd (50 bbe) in Kenhardt slaags en dit was weereens Lions wat die bordjies verhang het.

Kenhardt Northern Lions het eerste gekolf en 72 lopies in 15.5 boulbeurte aangeteken.

Franco Swart (6/25 in 4.2 bbe) het soos ‘n Kalahari-stofstorm deur die tuisspan se kolforde gemaai en is soos verlede week weereens as Speler van die Wedstryd aangewys.

Swart, ‘n puik veelsydige speler, is tans skitterend op stryk met die rooi leerbal.

LEES OOK: Upington Lions vermorsel Carltonians met oorweldigende 255-lopie-sege

Lions het die teiken, met net die verlies van Gerrie Pretorius (6) se paaltjie, met gemak gehaal om met nege paaltjies te wen.

Jaco Beukes (41*, 45b) en JP Theron (9*) het tot die einde van die wenteiken voor die penne gestaan. Lions wen met nege paaltjies.