MOORREESBURG – Die Weskus Distriksmunisipaliteit se brandbestrydingsvermoë het ‘n groot hupstoot gekry met die oorhandiging van nuwe brandweerwaens en noodreaksietoerusting deur die Wes-Kaapse Provinsiale Rampbestuursentrum.

Anton Bredell, die Wes-Kaapse minister van Plaaslike Regering, Omgewingsake en Ontwikkelingsbeplanning, het die toerusting op Woensdag 5 Augustus aan die uitvoerende burgemeester, raadslid Boffie Strydom, brandweerhoof Bertus Senekal en stasiebevelvoerders van die Weskus Brand- en Reddingsdienste oorhandig.

Die nuwe voertuie en toerusting sal brandbestryders in staat stel om vinniger en doeltreffender op noodgevalle te reageer en sodoende lewens, eiendom, landbouhulpbronne en gemeenskappe regoor die Weskus beter te beskerm.

“Ons brandbestryders staan op die voorpunt wanneer rampe toeslaan. Deur in moderne toerusting te belê, verseker ons dat hulle oor die nodige hulpmiddels beskik om lewens te red en ons gemeenskappe te beskerm,” het Bredell gesê.

Volgens Senekal het die onlangse Piket-Bo-Berg-veldbrand weer beklemtoon hoe belangrik dit is om goed voorbereid te wees.

“Wanneer jy met brande van hierdie omvang te doen kry, kan die regte toerusting, opleiding en ondersteuning die verskil maak.”

Strydom het beklemtoon dat samewerking tussen alle rolspelers die sleutel tot suksesvolle rampbestuur bly.

“As die distriksmunisipaliteit, kan ons dit nie alleen doen nie. Vennootskappe tussen die provinsiale regering, plaaslike munisipaliteite en ander rolspelers stel ons in staat om hulpbronne te deel en ‘n groter verskil in ons gemeenskappe te maak.”

Die belegging versterk Weskus Brand- en Reddingsdienste se vermoë om ‘n uitgestrekte gebied met groot landboustreke, afgeleë gemeenskappe en unieke brandrisiko’s doeltreffend te beskerm.