VELDDRIF – Sowat 50 inwoners het die afgelope maand noodhulpopleiding voltooi. Sertifikate is verlede Vrydag (18 September) by die Noordhoek-gemeenskapsaal oorhandig.

Die opleiding volg op die Wes-Kaapse vereniging vir organisasies sonder winsbejag se beroep op die Wes-Kaapse departement van gesondheid vir verbeterde ambulansdienste in Velddrif en omliggende gebiede.

Die doel was om inwoners met noodhulpkennis en praktiese vaardighede toe te rus sodat hulle as eerste reageerders kan optree totdat professionele nooddienste opdaag.

Die eerste sessie is op 6 Augustus by die Noordhoek-gemeenskapsaal aangebied, met sowat 22 inwoners wat dit bygewoon het. Verdere opleiding het oor die daaropvolgende weke plaasgevind.

Jan Hahne, stasiebevelvoerder van Saldanhabaai-nooddienste, het die opleiding aangebied.

Die projek is daarop gemik om ‘n netwerk van opgeleide vrywillige eerste reageerders in die Velddrif-omgewing te vestig.

Die raadslid Johan Moolman was die seremoniemeester op die sertifikaatoorhandigingseremonie. Denise Himiker, adjunkvoorsitter van die Wes-Kaapse NPO-vereniging, het die geleentheid toegespreek. Elvin Pedro, hoof van Weskus-nooddienste, en Ray van Rooy, Bergrivier-munisipaliteit-burgemeester, het ook toesprake gelewer. Boffie Strydom, Wes- kus-distriksmunisipaliteit-burgemeester, het ook die geleentheid toegespreek.

Sertifikate van waardering is aan fasiliteerders en vrywilligers oorhandig.

Die opleiding beteken dat sowat 50 inwoners nou oor noodhulpvaardighede beskik wat hulle kan gebruik om hulp te verleen tydens noodgevalle.