VREDENBURG – Duisende Suid-Afrikaanse verbruikers koop volgens die Nasionale Reguleerder vir Verpligte Spesifikasies (NRCS) onwetend produkte wat veiligheidsrisiko’s kan inhou omdat dit nie aan verpligte standaarde voldoen nie.
Om dié probleem hok te slaan, het die NRCS, ‘n entiteit van die departement van handel, nywerheid en mededinging, vandeesweek ‘n gesamentlike afdwingingsoptrede in die Wes-Kaap van stapel gestuur om substandaard- en onwettige goedere op te spoor en uit die mark te verwyder.
As deel van die optrede het die NRCS, in samewerking met ander wetstoepassingsowerhede, tussen Dinsdag 7 en Donderdag 9 Julie verrassingsinspeksies by ondernemings in Saldanha en Vredenburg uitgevoer.
Die doel van die inspeksies was om onveilige produkte te identifiseer, dit uit die mark te verwyder en te verseker dat handelaars aan die verpligte spesifikasies wat ingestel is om verbruikers te beskerm, voldoen.
