‘n Groep toegewyde apostels en pastore van onder meer Vredenburg het Saterdag 5 September ‘n belangrike mylpaal bereik toe hulle amptelik as trou-offisiere ingehuldig is.
Die groep het onlangs die huweliksbeampte-kursus suksesvol voltooi nadat hulle opleiding en eksamens deur die Departement van Binnelandse Sake in Vredenburg, Atlantis en Malmesbury ondergaan het.
Hoewel die eksamen vir sommige deelnemers uitdagend was, het hulle volhard en die kursus suksesvol voltooi. Hul mentor, dr. Jan Skippers, het spesiaal van Kaapstad af gereis om die nuwe trou-offisiere in Vredenburg in te huldig en hul prestasie te vier.
Skippers het gedurende die 2026-eksamenproses altesaam 16 toekomstige trou-offisiere gementor en begelei.
Die inhuldiging is nie net ‘n erkenning van hul akademiese prestasie nie, maar ook van hul bereidwilligheid om ‘n belangrike diens aan die gemeenskap te lewer deur huwelike amptelik te voltrek.
