Die Hoërskool Diazville het onlangs drie merkwaardige onderwysers wat aftree, gegroet.

Met ongeveer 34 en 35 jaar afsonderlik in die onderwys, het die Hoërskool Diazville se skoolhoof, Paul Haricombe, die adjunkhoof, Gregory Makan, en die onderwyseres Jocelyn Haricombe amptelik die tuig neergelê.

Wanneer dit kom by oor waarop hy die meeste trots is in sy loopbaan, sê Haricombe, is hy trots op al die sukses­verhale van oudleerders en hoe hulle op alle vlakke van die samelewing presteer. “Ons skool het al dokters, ingenieurs, prokureurs, sakelui, professors en selfs ‘n vlieënier opgelewer. Dit is ‘n goeie gevoel vir opvoeders om ‘n klein verskil in ander mense se suksesse te kan maak en te sien hoe hulle in hul beroepe vorder. Dit maak onderwys die moeite werd,” sê Haricombe.

Makan glo ook as onderwyser hul grootste prestasies lê in die ­sukses van hul leerders.

“Ek ken geen ­groter vreugde as om jou kennis oor te dra tot voordeel en opheffing van die gemeenskap nie. Vir my, as ‘n wiskunde-onderwyser, was dit nog altyd ‘n onbeskryflike vreugde wanneer die matriekuitslae bekend gemaak is en ons leerders goed presteer het in die vak. Dit het nie net hul eie toekoms verbeter nie, maar ook bygedra tot ‘n beter algehele slaagsyfer vir die skool.”

Van Makan se loopbaanhoogtepunte sluit in die skool se sterk prestasies in die Nasionale Seniorsertifikaat-eksamen, insluitend uitstaande individuele leerders se uitslae, sowel as die erkenning wat die Hoërskool Diazville in 2023, 2024 en 2025 van die ­Wes-Kaapse Onderwysdepartement ontvang het. Hy onthou ook met trots die skool se 91,4%-matriekslaagsyfer in 2025 en die 2024-groep wat die meeste suksesvolle kandidate in die gebied gelewer het.

Onder die hoogtepunte vir Haricom­be is dit die uitstekende akademiese prestasies wat die skool die afgelope paar jaar behaal het.

Hy is besonder trots op die toekennings wat die skool die afgelope drie jaar van die Wes-Kaapse Onderwysdepartement ontvang het, asook die geleentheid om die toekennings namens die skool by Leeuwenhof te ontvang.

Albei stem saam dat die emosionele laaste dae by die Hoërskool Diazville ‘n mengsel van trots en nostalgie ­gebring het, aangesien die skool oor baie jare ‘n tweede tuiste geword het waar kameraadskap en spanwerk ‘n groot deel van hul daaglikse lewe gevorm het.

Met hul aftrede sien albei daarna uit om meer tyd saam met hul familie en vriende deur te bring, te reis, te lees en die vrugte van hul jare lange diens te geniet.

Hoewel hulle die klaskamer verlaat, sê hulle hulle sal altyd bereid wees om waar nodig steeds ‘n bydrae te lewer tot die skool wat hul loopbane gevorm het.