KURUMAN – CSA-toernooie. Hoërskool Kalahari se krieketprogram het rede om trots te wees. Tien spelers is gekies om die Noord-Kaap op provinsiale vlak tydens die komende Cricket South Africa (CSA)-toernooie in Desember te verteenwoordig.

Hierdie besonderse prestasie getuig van die talent, toewyding en harde werk wat die spelers deur die seisoen getoon het. Dit bevestig ook die groeiende status van Hoërskool Kalahari as een van die provinsie se sterk krieketskole.

Die tien spelers is vir die volgende spanne gekies:

Noord-Kaap o.16-span

• Strauss van Heerden

Hy sal die provinsie tydens die toernooi in Bloemfontein verteenwoordig.

Noord-Kaap o.17-span

• Zian Shepherd
• Luan Joubert
• Kabelo Pitsoyagkosi
• Ezekiël Cloete
• Ruben Marè

Die toernooi word in Kuruman en Kathu aangebied. Dit bied die spelers die geleentheid om hul talent op bekende velde ten toon te stel.

Noord-Kaap o.19-span:

• Carl Thole
• Janko Noeth
• Kopano Mosienyane
• Myburgh de Klerk

Die insluiting van die vier Kalahari-spelers in die Noord-Kaap o.19-span is ‘n groot hoogtepunt vir die gesogte Khaya Majola-week in Stellenbosch.

Hierdie prestasie is besonder betekenisvol vir die skool. Dit is die eerste keer dat vier Hoërskool Kalahari-spelers terselfdertyd vir die Khaya Majola-week gekies word. Met vier spelers in die o.19-span het die skool ook die grootste verteenwoordiging in die Noord-Kaapse groep.

Die spelers se sukses is die resultaat van talle ure se harde werk op en van die veld af. Dit weerspieël ook die waarde van toegewyde afrigting, sterk ondersteuning deur ouers en die skool se verbintenis tot sportontwikkeling.

Hoërskool Kalahari het die spelers, hul afrigters en families gelukgewens met die uitstekende prestasie. Die skool wens die tien Eagles alle sterkte toe vir die komende toernooie.

Van die Kalahari se duine tot op die provinsiale verhoog vlieg die Eagles inderdaad hoog. Hulle dra nie net hul eie drome nie, maar ook die trots van hul skool en gemeenskap.

https://www.kalaharihighschool.co.za

Foto’s verskaf