Con Spirito Forte LIVE. Fichardtpark Primêre Skool se kultuurtrots het onlangs ’n hoogtepunt bereik. Fichies se Blokfluitensemble, asook Giselle Venter is as nasionale itemwenners tydens die gesogte Con Spirito Forte LIVE-kompetisie 2026 aangewys.
Die Blokfluitensemble het die titel verower in die kategorie Instrumentaal – Kontemporêr. Hulle het met samewerking, tegniese vaardigheid en musikale sensitiwiteit die beoordelaars beïndruk. Hierdie prestasie beklemtoon nie net die talent van die individuele leerders nie, maar ook die krag van spanwerk en toewyding.
In die afdeling ‘Sang/Vocal with Backtrack’ – Ligte Musiek, Gr. 6 het Giselle Venter haar merk gemaak met ’n vertolking wat die gehoor en beoordelaars diep geraak het. Haar stemkwaliteit, interpretasie en selfvertroue het haar ’n welverdiende plek as nasionale wenner besorg.
Die skool spreek sy waardering uit teenoor juf. Celesté, wie se leiding en mentorskap ’n sleutelrol gespeel het in die voorbereiding en sukses van beide die ensemble en Giselle. Hierdie prestasie is ’n bewys van die hoë standaard van kultuuronderrig by Fichardtpark Primêre Skool.
Met hierdie uitsonderlike prestasies dra die leerders die naam van hul skool met trots en bevestig hulle dat harde werk, dissipline en passie altyd beloon word.
“Baie geluk aan elke lid van die ensemble, aan Giselle, en aan juf. Celesté – julle maak die Fichie-gemeenskap ongelooflik trots!“
Foto’s voorsien
You must be logged in to post a comment.