Action Cricket Interprovinsiale Toernooi. Hoërskool Stellenberg se krieketspelers het onlangs hul talente ten toon gestel tydens die Action Cricket Interprovinsiale Toernooi. Verskeie van die skool se jong sterre het met puik prestasies uitgeblink.
Die o.14 Blou-span (A-span), waarin Jean Stemmet en Janu Thiart Stellenberg verteenwoordig het, het ’n welverdiende bronsmedalje verower. Die o.14 Rooi-span (B-span), met Daniël Zaaiman en Lohann Theron in die span, het ongelukkig in die Plaatfinaal vasgeval.
Individuele erkenning het ook nie ontbreek nie. Janu Thiart en Lohann Theron is as All Stars aangewys. Dit is ’n eer wat slegs aan die tien beste spelers in hul ouderdomskategorie toegeken word. Lohann Theron het boonop die titel van beste bouler in die o.14-afdeling verower. Hierdie prestasie onderstreep sy talent en toewyding.
In die o.16 Blou-span (A-span) het Hanru Visser Stellenberg se naam hoog gehou toe sy span ook ’n bronsmedalje huis toe gebring het.
Hoërskool Stellenberg spreek sy trots en waardering uit teenoor al hierdie spelers wat die skool se sporttradisie met soveel ywer en uitnemendheid voortdra.
You must be logged in to post a comment.