BLOEMFONTEIN – Nasionale vlak. Twee leerders van Hoërskool Jim Fouché het onlangs op nasionale vlak uitstekende prestasies behaal. Imke Cruywagen en AJ Theron het elkeen in hul onderskeie buitesporte deelgeneem en skitterend presteer.
Imke Cruywagen het van 28 tot 30 September aan die SA Luggeweerskietkampioenskappe by Hoërskool Sentraal in Bloemfontein deelgeneem. Sy het in die o.14-afdeling ‘n uitstekende agtste plek behaal teen sterk kompetisie van regoor die land.
Imke was ook deel van die B-span wat ‘n algehele tweede plek verower het. Verder het sy ‘n Expert-wapen vir 3P en ‘n skerpskutterwapen vir 10 meter verwerf. Met ‘n indrukwekkende totaal van 1 379 punte het sy ook vir haar Sporter-bronsbalkie gekwalifiseer.
Hierdie prestasies getuig van haar toewyding, dissipline en die ure se harde werk wat nodig is om op nasionale vlak mee te ding. Luggeweerskiet vereis uitsonderlike konsentrasie, tegniese vaardigheid en selfbeheersing, eienskappe wat Imke duidelik ten toon gestel het.
Nog ‘n leerder wat onlangs groot sukses behaal het, is AJ Theron, wat op 3 Oktober aan die Afrika Laser Run-kampioenskappe in Kaapstad deelgeneem het.
AJ het ‘n bronsmedalje verower met ‘n derde plek in die o.19-mansafdeling. Hy het ook as een van drie spanlede ‘n sleutelrol gespeel in Suid-Afrika se goue medalje en eerste plek in die spankompetisie.
Laser Run, wat hardloop en laserskiet kombineer, plaas hoë eise aan deelnemers se fiksheid, spoed en akkuraatheid. AJ se prestasie beklemtoon sy veelsydigheid as atleet en sy vermoë om onder druk uit te blink.
Die uitstaande prestasies van Imke en AJ is ‘n bewys van die talent wat by Hoërskool Jim Fouché ontwikkel word. Die skool is trots op albei leerders wat deur hul harde werk en deursettingsvermoë op nasionale vlak uitgeblink het en as uitstekende ambassadeurs van die skool opgetree het.
Foto’s voorsien
