Jongmense van oor die Hantam en Karoo-hoogland-streek heen het onlangs by die Hoërskool Loeriesfontein ’n loopbaanekspo bygewoon.
Meer as 300 leerders van ses skole het hierdie tweede jaarlikse geleentheid bygewoon, met ’n totaal van 347 deelnemers, insluitend 257 graad 12-leerders, asook graad 10- tot graad 12-leerders van die gasheerskool.
Die ekspo het ruimte geskep om studie-opsies, opleidingsbane en toekomstige loopbane te verken.
Vir talle wat uit omliggende dorpe gereis het – sommige so ver as 300 kilometer – het die geleentheid seldsame regstreekse toegang tot instellings, werkgewers en loopbaanvoorligting gebied. Dit het aan ’n duidelike behoefte in landelike gemeenskappe voorsien, waar sulke blootstelling dikwels beperk is.
LEES OOK: Belegging in onderwysers versterk hele Loeriesfontein-gemeenskap
“Hierdie inisiatief gee aan leerders waardevolle blootstelling aan ’n verskeidenheid tersiêre-onderriginstellings en loopbaanrigtings. Dit help om hul horisonne te verbreed, en bemagtig hulle om ingeligte vak- en loopbaankeuses vir die toekoms te maak.
“Vir talle leerders uit landelike gemeenskappe is hierdie soort toegang ’n inspirasie en motivering, en moedig hulle aan om verdere studie na te streef en hulle akademiese prestasie te verbeter. Ons is dankbaar teenoor die windplase wat die program befonds het, en teenoor Rise & Excel dat hulle hierdie geleentheid moontlik gemaak het,” sê Jacques Klaaste, hoof by die Hoërskool Loeriesfontein.
Ekspo befonds
Die leerders het ’n verskeidenheid geleenthede benut wat verskillende belangstellings en sterk punte uitgelig het, insluitend akademiese studie en tegniese en beroepsopleiding, en praktiese loopbaanrigtings.
Die ekspo is deur die Loeriesfontein- en Khobab-windplaas befonds as deel van voortgesette pogings om onderwys en langtermyn-gemeenskapsontwikkeling te ondersteun.
“Vir talle leerders in landelike gemeenskappe kan toegang tot loopbaanvoorligting en blootstelling aan verskillende geleenthede beperk wees. Hierdie ekspo bring hulle in aanraking met instellings, werkgewers en kundiges wat kan help om aan hul toekoms vorm te gee,” sê Vanessa Fredericks, ekonomiese ontwikkelingsbestuurder vir die Loeriesfontein- en Khobab-windplaas.
Uitstallers het ingesluit Universiteit Stellenbosch, Akademia, Africa Skills Privaat Kollege, die Suid-Afrikaanse Polisiediens, ’n plaaslike rooibosfabriek in Nieuwoudtville, Logans Rugby, en twee verteenwoordigers van die windplase en een van Siemens Gamesa.
