Die elftal van Dawid Kruiper United (DKU) het Maandagaand voor ‘n groot skare in die Dicky Jacobs-stadion in Upington die Cornald Mouers-sokkertoernooi, wat van 3 tot 6 April plaasgevind het, gewen.
In die eindstryd het DKU die span van Rosedale United oortuigend met 5-2 verslaan nadat hulle rustyd reeds ‘n gerieflike voorsprong van 3-1 gehad het. DKU se span is uit spelers van die Kaap, Gauteng en Kakamas saamgestel.
Die wenspan, gelaai met ervare spelers wat gereeld in die Motsepe-reeks speel, was een te veel vir Rosedale United wat nooit gaan lê het nie. ‘n Algemene gevoel onder die toeskouers was juis dat DKU ongetwyfeld die gunsteling was om die titel te wen.
Die twee doele wat die tuisspan se Ricardo Aron aangeteken het, was juwele. Vir DKU het Ashley Nel (2), Ronnie Matthys, Thato Mphelka en M. Khenzo doele geskiet. Ricardo is aangewys as die beste doelskieter met vyf van die bestes van die toernooi. Rosedale United se Matthewin Januarie (21) is doelwagter van die toernooi, en Ronnie van DKU speler van die toernooi.
Die kwarteindstryd tussen Tornado en DKU is allerweë beskou as ‘n soort eindstryd omdat dié twee spanne eintlik die beste was van 24 spanne wat die afgelope Paasnaweek aan dié prestige-toernooi deelgeneem het.
Duisende woon toernooi by
Bykans 28 000 mense het die toernooi tydens die vier dae bygewoon wat ‘n duidelike bewys is dat sokker in hierdie geweste baie gewild geword het, en dat die toernooi steeds elke jaar net groter en beter word.
Aan drama, terugslae en opwinding het dit nie ook nie by die toernooi ontbreek nie. Somtyds het die gemoedere vlam gevat tussen spelers, skeidsregters en spanbeamptes wat bygedra het tot ‘n toernooi vol emosies en hoë drama.
“Dit is maar hoe dit gaan by sulke groot toernooie,” sê ‘n toernooi-beampte.
- Kwarteindstryd-uitslae: Black Cats (1), Black Pools (0); DKU (1), Tornado (0); Amalauws (2), Rosedale Warriors (0); Rosedale United (3), Môrestêr Jeug (2).
- Halfeindstryd: Rosedale United (1), Amalauws (0); DKU (2), Black Cats (0).
LEES OOK: Groblershoop se sokkerspan troef gietende reën in jaarlikse toernooi
You must be logged in to post a comment.