Die voormalige wêreldrekordhouer en atleet Sydney Maree word in Oktober tydens die 16de Dagbreek-straatmyl in Stellenbosch as myl-legende vereer.
Maree het op 28 Augustus 1983 in Keulen, Duitsland 3:31.24 gehardloop om ‘n nuwe wêreldrekord in die 1 500-m-wedloop op te stel.
Met dié tyd het hy Steve Ovett se wêreldrekord verbeter.In 1985 het Maree die 3.30-tydsgrens in die 1 500 m in 3:29.77 gebreek. Dit was vir 20 jaar die Amerikaanse 1 500-m-rekord.
In 1981 het hy die eerste 5th-Avenue-straatmyl in New York in 3:47.52 verbeter. Die rekord het vir 43 jaar gestaan en is eers in 2024 deur Josh Kerr tot 3:44.3 verbeter. Kerr het op Saterdag 18 Julie in Londen ‘n nuwe wêreldrekord in die myl opgestel (3:42.66).
LEES OOK: Twaalfde Dagbreek Straatmyl spog weer met groot name
Ander legendes vereer
Die gewildheid van die myl is onderstreep deur die feit dat die 1 500 m tydens die onlangse Statebondspele in Glasgow, Skotland, deur die myl vervang is. Kerr was die wenner.
Die Dagbreek-straatmyl ontdek nie net nuwe talent nie, maar erken myl-legendes van weleer en stel hulle aan ‘n nuwe generasie voor.
Atlete wat oor die jare heen vereer is, sluit in De Villiers Lamprecht, Danie Malan, Zola Budd-Pieterse en Johan Fourie, en vanjaar is dit Maree se beurt.
Hy het sy eerste droommyl as skoolkind in 1987 in 3:57.9 gewen. Sy beste myltyd van 3:48.83 is in 1981 opgestel en hy is steeds die enigste gebore Suid-Afrikaner wat die myl onder 3:50 kon hardloop.
Maree het aan die 1988- Olimpiese Spele in Seoul deelgeneem en is ook vir die 1984-spele in Los Angeles gekies, maar ‘n besering het sy deelname gekelder.
Deel van fees
In 1981 was Maree die eerste swart atleet om as Suid-Afrika se Atleet van die Jaar aangewys te word en hy het in 2003 die Orde van Ikhamga (silwer) vir sy buitengewone bydrae tot atletiek ontvang.
Die Dagbreek-straatmyl, wat deel is van die Toyota Stellenbosch Woordfees, word op Woensdag 7 Oktober om 16:30 in Victoriastraat aangebied met sewe wedlope in 17 afdelings.
Musiek en vermaak word vir toeskouers aangebied.
Kontak Francois by 083 368 5948 vir navrae of om in te skryf.
You must be logged in to post a comment.