Die Breedevallei-munisipaliteit het inwoners verseker dat munisipale water in dié streek veilig is vir menslike verbruik ondanks ‘n ligte verkleuring in die water in sekere areas.
Sommige inwoners in Worcester en De Doorns sal dalk steeds ‘n ligte verkleuring in die water oplet na onlangse hoë reënval. Die munisipaliteit het in ‘n Facebook-verklaring gesê dit is as gevolg van verhoogde vlakke van slik en afsaksel (sediment) in primêre waterbronne, ‘n natuurlike verskynsel ná tydperke van swaar reënval en verhoogde afloop.
Die verkleuring is esteties van aard en affekteer nie die veiligheid van die water vir menslike verbruik nie.
Watervoorsieningstelsels wat Worcester, De Doorns, Rawsonville en Touws River bedien, bly operasioneel, met waterkwaliteit wat deurlopend gemonitor word deur gereelde toetsing en onafhanklike laboratoriumverifikasie.
Terwyl die voorkoms van die water in sommige areas aansienlik verbeter het die afgelope paar weke, gaan munisipale spanne voort om maatreëls te implementeer om waterhelderheid deur die hele stelsel verder te verbeter.
Spanne spoel en skrop sistematies waterpyplyne om oorblywende afsaksel en verkleurde water te verwyder. Inwoners wat ‘n bykomende vlak van sekerheid verkies, kan kies om water te kook voor verbruik, alhoewel dit nie ‘n vereiste is nie aangesien munisipale water veilig bly om te drink, verseker die munisipaliteit.
Alternatiewe drinkwater bly beskikbaar by die volgende staanpyp-liggings wat direk vanaf Fairy Glen-dam voorsien word:
- Haarlemstraat (Audensburg-kerk)
- Otto du Plessisstraat 21
- Otto du Plessisstraat 53
- Quelleriestraat 5
‘n Watertenk bly ook in plek om drinkwater aan inwoners in die Transhex-area te verskaf.
Die munisipaliteit het gesê hy verstaan inwoners se bekommernis rakende die voorkoms van hul drinkwater en bly verbind tot die beskerming van openbare gesondheid. Waterkwaliteit en behandelingsprosesse word deurlopend fyn gemonitor, met verdere opdaterings wat verskaf sal word soos toestande verbeter.
