JACOBSBAAI – Jacques Umans (66) en sy vrou, Marlene Umans (68), moes Maandag 31 Augustus in die hof verskyn het op aanklagte van bedrog, kuberbedrog en geldwassery. In plaas daarvan is hulle dood met skietwonde op ’n piekniekbankie in Jacobsbaai gekry.

Dié uitkykpunt is ’n gewilde bestemming vir stappers en toeriste omdat dit terselfdertyd ’n uitsig oor die see en die dorpie se wit huise bied.

Die Umans-egpaar is vroegoggend langs mekaar op die bankie ontdek met ’n Spaans-vervaardigde 9 mm-pistool op Jacques se skoot.

Die egpaar, oorspronklik van Citrusdal, was die afgelope maande bekende gesigte by verskeie Weskus-markte waar hulle Kardoes-biltong en soms perskes by hul stalletjie verkoop het.

Die polisie en ander nooddienste is vroeg Maandagoggend na die uitkykpunt ontbied, waarna ’n volledige forensiese ondersoek op die toneel gedoen is. Speurders van die Saldanha-polisie ondersoek die omstandighede rondom die egpaar se dood. Dat die Umans-egpaar selfdood gepleeg het, is een van die moontlikhede wat die speurders ondersoek.

Bedrogklag van meer as R7 miljoen

Die Umans was veronderstel om op dié noodlottige dag, saam met hul dogter, vir die eerste keer op aanklagte van bedrog, kuberbedrog en geldwassery in die hof te verskyn. Die dogter se naam is aan Weslander bekend, maar sy kan eers geïdentifiseer word sodra sy in die hof verskyn.

Volgens kapt. Tania Helfrich, die distrikswoordvoerder vir die Weskus-polisie, het ’n sakeman van Citrusdal ’n klagte aangemeld oor R7 355 651 wat tussen 2020 en 2021 uit sy onderneming verduister is. Dokumente is glo vervals.

Die beweerde ongerymdhede het tydens ’n oudit van die onderneming se boeke aan die lig gekom.

Die egpaar en hul dogter is op Woensdag 12 Augustus amptelik aangekla. Die dogter gaan nou alleen in die beskuldigdebank staan op Maandag 26 Oktober.

Die polisie-ondersoek na die tragiese voorval duur voort.