PIKETBERG – Die uitbreiding van die Piquetberg Mall het reeds ‘n beduidende aantal nuwe winkels en werksgeleenthede na die dorp gebring, met 37 van die 40 beplande winkels wat reeds in bedryf is.
Volgens Philip Jankielsohn, die eienaar van die sentrum, het al 40 winkels huurkontrakte onderteken.
Die laaste drie sal hul deure na verwagting teen die einde van die jaar of vroeg volgende jaar open.
Die oorblywende winkels sluit ‘n Sinco-drukwerkwinkel in, waar die installering van die winkel se uitleg en toerusting tans aan die gang is, asook ‘n Persiesetapytwinkel.
Die derde is FNB, wat na ‘n bestaande huurperseel in die sentrum sal verskuif. Dié verhuising word vroeg in die nuwe jaar verwag.
Voltooiingsdatum steeds onseker
Hoewel die meeste winkels reeds oop is, is die bouwerk aan die uitbreiding nog nie heeltemal afgehandel nie. Jankielsohn het aan Weslander gesê die projek het verskeie vertragings weens probleme met die hoofkontrakteur ondervind en werk van ‘n onbevredigende gehalte wat oorgedoen moes word. Volgens hom het die eienaars herhaaldelik ‘n datum vir praktiese voltooiing aangevra, maar die kontrakteur kon nog nie ‘n finale datum bevestig nie.
Die hoop is dat die oorblywende bouwerk teen die einde van Oktober afgehandel sal wees.
Jankielsohn het bygevoeg dat die uitstaande werk, vanuit ‘n klant se oogpunt, relatief gering is.
Meer as 400 mense in diens
Die uitbreiding het volgens Jankielsohn reeds ‘n ekonomiese bydrae tot Piketberg gelewer. Meer as 400 mense is tans by die winkelsentrum in diens.
Hy het ook verwys na ‘n styging in munisipale tariewe en belasting, asook hoër eiendomswaardasies in die dorp se sentrale sakekern.
Volgens Jankielsohn het die winkels wat reeds geopen het, hul beste openingsnaweke nóg in vergelyking met die opening van hul ander takke aangeteken.
Met die meeste winkels reeds oop en die oorblywende huurders wat voorberei om hul deure te open, is die uitbreiding ‘n belangrike ontwikkeling vir die dorp se kleinhandelsektor.
Badkamergeriewe vir besoekers
Intussen het Weslander ook navrae van lesers ontvang oor die R2-heffing vir toegang tot die winkelsentrum se badkamergeriewe. Die navraag het veral betrekking op plaas- en seisoenwerkers wat die dorp besoek en van die sentrum se parkeergeriewe gebruik maak.
Jankielsohn het verduidelik dat die heffing ‘n historiese maatreël is wat ingestel is om toegang te beheer ná herhaalde gevalle van ernstige vandalisme en die beskadiging van die toilette. “Die R2 dek geen uitgawes nie. Dit is slegs bedoel om hierdie soort vandalisme te voorkom,” het hy gesê.
Volgens hom help die toegangsbeheer om die toilette skoon en veilig te hou.
Hy het bygevoeg dat die dorp se openbare geriewe gedurende naweke onder druk kom wanneer plaas- en seisoenwerkers Piketberg besoek. Die winkelsentrum se ligging naby die taxistaanplek dra ook by tot die vraag na openbare toilette.
Om die druk op die dorp se openbare geriewe te verlig, is ‘n blok openbare toilette by die sentrum aangebring wat gratis gebruik kan word, maar slegs oor naweke oop is.
Jankielsohn het gesê die fasiliteit bied ‘n alternatief aan mense wat voorheen die openbare park as ‘n toilet gebruik het. “Ons glo almal moet met waardigheid en respek behandel word,” het hy gesê.
Met 37 winkels reeds oop, meer as 400 mense in diens en die laaste huurders wat na verwagting binnekort sal volg, bly die fokus op die afhandeling van die oorblywende bouwerk en die verdere vestiging van die sentrum as deel van Piketberg se sakekern.
LEES OOK: Piketberg-inwoners ‘praat saam’
