ATLANTIS – Inwoners van Beaconhill het nou self ‘n standpunt teen misdaad ingeneem nadat hulle tydens ‘n gemeenskapsvergadering besluit het om hul samewerking met die Suid-Afrikaanse Polisiediens en die Gemeenskapspolisiëringsforum (GPF) te versterk.
Die misdaadbewusmakingsvergadering is by ‘n woning in Darling-singel gehou, waar inwoners hul kommer uitgespreek het oor toenemende misdaad en maniere bespreek het om die veiligheid in hul woonbuurt te verbeter.
AO Denver Abrahams, die sektorbevelvoerder vir Beaconhill, en Glodene Smith, ‘n GPF-verteenwoordiger, het die vergadering bygewoon en inwoners aangemoedig om nou saam met die polisie en bestaande veiligheidsstrukture te werk.
Verskeie inwoners het hul frustrasie uitgespreek oor stadige reaksietye wanneer misdaad aangemeld word, probleme om die Atlantis-polisiekantoor se landlynnommers te bereik en ‘n tekort aan sigbare polisiëring in sekere dele van die woonbuurt.
Kabeldiefstal bly volgens inwoners een van die grootste probleme in Beaconhill.
Kommer is ook uitgespreek oor groepe wat gereeld op die oop terrein tussen Aventineweg, Castlehill en Carltonweg bymekaarkom, asook beweerde dwelmhandel in Beekberg-singel.
Abrahams het gesê misdaad kan slegs suksesvol bekamp word indien die gemeenskap en die polisie saamwerk.
“Polisiebeamptes moet passie vir hul werk hê en die bekamping van misdaad is nie net die verantwoordelikheid van die polisie nie, maar elke inwoner het ‘n rol om te speel om ‘n veiliger omgewing te skep,” het Abrahams bygevoeg.
Kontakbesonderhede is tydens die vergadering tussen polisie, GPF-verteenwoordigers en inwoners uitgeruil om kommunikasie te verbeter en voorvalle vinniger aan te meld.
Die Beaconhill-buurtwag word intussen met die ondersteuning van die GPF gevestig. Opleiding sal aan lede gebied word om hulle vertroud te maak met hul verantwoordelikhede, die wetlike raamwerk waarbinne hulle moet optree en hoe om doeltreffend saam met die polisie te werk, het Smith gese.
Inwoners het ook kennis geneem van onlangse suksesse deur die polisie, soos die inhegtenisneming van ‘n verdagte wat met kabeldiefstal verbind word, asook optrede teen ‘n skuilplek naby Lucas Run waar dwelms en vermoedelik gesteelde goedere glo versteek is.
