VRYSTAAT – Meer as 1 600 beeste en 730 skape is glo die afgelope maand in die Vrystaat gesteel, met ’n geraamde waarde van sowat R8 miljoen.

Die jongste waarskuwing van die polisie oor die skerp styging in veediefstal in die Vrystaat, tesame met veiligheidswenke aan boere, is nie genoeg om die probleem hok te slaan nie, sê die VF Plus.

Volgens die party doen boere reeds alles in hul vermoë om hul vee te beskerm en bestee hulle miljoene rande aan private sekuriteit en kamerastelsels.

Die VF Plus voer aan dat dit die staat se verantwoordelikheid is om misdaad te voorkom en verdagtes aan te keer, maar dat dit tans nie doeltreffend genoeg gebeur nie.

Volgens die polisie se waarskuwing is meer as 1 600 beeste en 730 skape die afgelope maand in die Vrystaat gesteel. Die geraamde waarde van die vee beloop sowat R8 miljoen.

Die VF Plus meen die bedrag weerspieël egter nie die volle omvang van die finansiële verlies nie. Selfs jong speenkalwers en goedkoper skape kan gesamentlik minstens R15 miljoen werd wees, volgens die party.

Indien teeldiere, dragtige verse of bulle onder die gesteelde vee was, kan die werklike verlies aansienlik hoër wees. Die emosionele impak en finansiële druk wat veediefstal op boere plaas, kan boonop nie bloot in geldwaarde gemeet word nie.

VF Plus vra syfers oor sake en vervolgings

Die VF Plus sê hy sal Jabu Mbalula, die Vrystaatse LUR vir gemeenskapsveiligheid, paaie en vervoer, versoek om bekend te maak hoeveel veediefstalsake die afgelope 12 maande aangemeld is.

Die party wil ook weet hoeveel van dié sake tot inhegtenisnemings en suksesvolle vervolgings gelei het.

Volgens die VF Plus meld sommige boere nie meer alle voorvalle aan nie omdat hulle voel dat die owerhede hulle in die steek laat en dat hul sake dikwels nie aandag geniet nie.

Die party eis verder ’n vergadering met die departement om die toepassing van die landelike veiligheidstrategie te bespreek.

Volgens die VF Plus moet die strategie behoorlik geïmplementeer word om veediefstal te voorkom en boere se vee en eiendom beter te beskerm.

Die party sê boere behoort nie langer vee en inkomste te verloor weens wat hy as die versuim van owerhede beskou om hul verantwoordelikhede na te kom nie.

Die VF Plus doen ’n beroep op die staat om sy grondwetlike verantwoordelikhede na te kom en daadwerklike stappe teen veediefstal te doen.