Bergfietsryers van die Hoërskool Witteberg het podiumplekke behaal op die eerste byeenkoms van die Vrystaat-skole-MTB-reeks.
Witteberg het 21 deelnemers na die byeenkoms op Saterdag 6 Junie op die plaas Middelwater by Bloemfontein gestuur. Die tegniese roetes en veeleisende terrein het vaardighede, uithouvermoë en deursettingsvermoë beproef.
Die skool se leerders het deurgaans sterk vertoon.
In die jeug-mansafdeling was Kyle Nel tweede, terwyl Waldo Burgers met ‘n derde plek ook op die podium was. Inge van Heerden het die jeug-vroueafdeling oorheers en die eerste plek ingeneem. Bronwyn du Preez was tweede en Danica Austin vierde.
In die junior-mansafdeling was Pedri Grobler tweede, terwyl Lané Fouché die wenner was in die sub-junior-vroueafdeling.
LEES OOK: Skoolmeisie werp gewigte met hengelstok dat dit dáár trek en haal span
Witteberg se aflosspanne het die dag op ‘n hoogtepunt afgesluit. Die meisies-aflosspan was eerste, terwyl die seunspan derde was.
Die uitslae getuig van die groei en ontwikkeling van bergfietsry by Hoërskool Witteberg en skep groot verwagtinge vir die res van die seisoen. Met so ‘n belowende begin kan die span met vertroue uitsien na die volgende byeenkomste in die Vrystaat-skole-MTB-reeks.
You must be logged in to post a comment.