Nasionale Ringbaltoernooi. Hoërskool Hoogenhout, Bethal, kondig met trots aan dat twee van hul eie sterleerders Mpumalanga by die Nasionale Ringbaltoernooi verteenwoordig het. Luïn en Mianké van der Watt het aan die Nasionale Ringbaltoernooi deelgeneem wat in Pretoria plaasgevind het.
Die toernooi bring jaarliks die beste jong ringbalspelers van regoor Suid-Afrika bymekaar. Provinsiale spanne sê mekaar die stryd aan in ’n week vol intense wedstryde, sportmanskap en spanbou. Dit is een van die hoogtepunte op die kalender van hierdie unieke Suid-Afrikaanse sportsoort. Hierdie toernooi bied spelers die geleentheid om hul vaardighede op nasionale vlak te toets.
Luïn het sy plek in die o.18 Seunspan vol selfvertroue ingeneem, terwyl sy suster Mianké met trots in die o.15 Meisiespan gespeel het. Dat ’n boetie en sussie gelyktydig hul provinsie kon verteenwoordig, is ’n besondere prestasie en ’n inspirasie vir die hele skoolgemeenskap. Hoogenhout se leerders en personeel is verheug oor hierdie prestasie.
Hoërskool Hoogenhout wens die van der Watt-sibbe geluk met hul harde werk en toewyding. Hulle deelname het nie net hul eie talent beklemtoon nie. Die twee het die naam van Hoogies met waardigheid en trots op die nasionale sporttoneel geplaas.
“Baie geluk, Luïn en Mianké – julle maak Hoogenhout trots!“
