Lumala oorwin Afrikaans. Toe Lulama Zizipho Nzinzane (gr. 11) in haar eerste jaar by Hoër Meisieskool Oranje ingestap het, het sy ’n groot uitdaging in die gesig gestaar. Afrikaans was haar vierde taal. Elke klas en toets het soos ’n berg gevoel, maar sy het vasgebyt en dubbel so hard gewerk om by te hou.
’n Onderhoud met haar graadhoof, mnr. Stefan Buys, het ’n keerpunt gebring. Hy het nie net ’n leerder gesien nie, maar ’n jongmens met potensiaal. Ná haar eerste toets het Lulama gehuil en getwyfel of sy by Oranje hoort. Tog het sy die volgende dag weer haar boeke oopgemaak en aangehou veg vir haar droom.
Die resultate het gou begin wys: haar eerste gr. 8-rapport het reeds ’n gemiddelde van 69% getoon. Vandag hou sy haar Afrikaanspunt stabiel rondom 70% en presteer sy akademies. Om haar taal te slyp, het sy Afrikaanse films met subtitels gekyk, terwyl haar registeronderwyser, mev. Iris Viljoen het haar vriende aangemoedig om net Afrikaans met haar te praat. En uiteindelik oorwin Lumala Afrikaans!
Viljoen beskryf haar as inspirerend en vol vasbyt, iemand wat elke raad ernstig opneem en nooit bang is om weer te probeer nie. Haar Afrikaans-onderwyser, mev. Mariska van Staden, sê sy is verstom oor Lulama se groei: “As sy eers besluit het sy gaan iets doen, hou sy eenvoudig nie op nie.”
