WELKOM – Die polisie in Welkom en Parkweg het ‘n 28-jarige man in hegtenis geneem vir die besit van vermoedelik gesteelde eiendom ná ‘n OTM-ontploffing in Marquard.

Woordvoerder vir die polisie in die Vrystaat, lt. kol. Thabo Covane, sê in ‘n verklaring dit volg op inligting oor die OTM-ontploffing op 29 September.

Die polisie het inligting ontvang oor waar die verdagte is en agt lede van die polisie het na Marquard gegaan om die plaaslike polisie te ondersteun.

Die span van die polisie het die huis in Riverside by Marquard op Dinsdag 7 Oktober omstreeks 08:30 bereik, waar een verdagte aangetref is en die perseel deursoek is. ‘n Bedrag van R38 950 is gevind, waarvoor die verdagte nie rekenskap kon gee nie.

Hy is in hegtenis geneem. Die polisie het ook beslag gelê op twee selfone wat as bewysstukke sal dien.

LEES OOK: Five suspects sought after Lindley ATM bombing

Tydens ondervraging deur die polisie is vasgestel dat die verdagte ook gesoek word vir ‘n rooftog van ‘n onderneming in Virginia waar ‘n groot bedrag geld gesteel is.

Die verdagte, wat afkomstig is van New Stance, Thabong, Welkom, sal na verwagting binnekort voor die Marquard-landdroshof verskyn op ‘n aanklag van die besit van vermoedelik gesteelde eiendom. Verdere aanklagte kan bygevoeg word namate die ondersoek voortgaan.