Nuwe Skoolhoof vir Hoërskool Frikkie Meyer. Met groot vreugde en ware Frikkie‑trots verwelkom Hoërskool Frikkie Meyer, Thabazimbi, hul nuwe skoolhoof, Mnr. Anton du Plessis, by die Frikkie‑familie. Sy aanstelling beteken die begin van ’n nuwe hoofstuk. Dit is gebou op geloof, sterk waardes en die strewe na uitnemendheid – die kern van wat Frikkies uniek maak.
Die Seniorraad is die eerste leiers waarmee mnr du Plessis gaan werk en hulle sien baie daarna uit om saam met hom te werk en van hom te leer.
“Ons glo dat hierdie reis saam met hom gevul sal wees met wysheid, seën en sukses. Onder sy leiding wil ons elke leerder inspireer om hul volle potensiaal te bereik en met trots deel te wees van die HFM‑gemeenskap.”
Die woorde uit Spreuke 3:5‑6 herinner die Frikkies dat ware leiding begin by vertroue in die Here. “Vertrou op die Here met jou hele hart en steun nie op jou eie insig nie. Ken Hom in alles wat jy doen, dan sal Hy jou die regte pad laat loop.”
“Welkom by die Ysters, Meneer du Plessis! Mag u tyd by Hoërskool Frikkie Meyer geseënd wees. Ons sien met opgewondenheid uit na die verskil wat u gaan maak.”
