Die Nasionale Vervolgingsgesag (NVG) sê hy verwelkom die besluit van die Pretoria-Noord landdroshof om borgtog te weier aan een van sy eie senior lede wat op aanklagte van gesinsgeweld teregstaan.
Adv. Lucas Motshabi (42), ‘n senior staatsadvokaat verbonde aan die Batebeslagleggingseenheid (AFU) in Kimberley, bly in aanhouding nadat die hof bevind het hy is ‘n moontlike vlugrisiko en kan sy vrou se veiligheid in gevaar stel.
Die saak spruit uit ‘n reeks voorvalle wat laat in 2025 begin het. In November 2025 het Motshabi se vrou ‘n beskermingsbevel teen hom verkry. Teen Desember 2025 het albei partye klagtes teen mekaar ingedien en is hulle in hegtenis geneem, maar later op borgtog vrygelaat.
Na suksesvolle mediasie is die klagtes wedersyds teruggetrek.
Die vrede was egter van korte duur. Slegs enkele dae nadat die klagtes teruggetrek is, het Motshabi na bewering op 21 Februarie vanjaar onaangekondig by hul voormalige gesamentlike huis in Pretoria-Noord opgedaag – ‘n direkte oortreding van sy borgvoorwaardes.
Volgens die NVG het ‘n argument ontstaan waarin Motshabi sy vrou na bewering aangerand het. Hy het glo ook klere uit ‘n kas geruk voor een van hul minderjarige kinders, die hek beskadig en al vier die bande van sy vrou se motor stukkend gesteek voordat hy die toneel verlaat het.
Beskuldigde ‘n moontlike vlugrisiko
Tydens die borgtogaansoek het die aanklaer, adv. Tumelo Letaoana, aangevoer Motshabi kan nie vertrou word nie. Letaoana het uitgewys dat die beskuldigde doelbewus sy adres in Kimberley weerhou het, wat hom ‘n vlugrisiko maak.
Die hof het saamgestem die erns van die misdrywe en die skending van die beskermingsbevel moet swaarder weeg as die beskuldigde se reg op vryheid.
Adv. Andy Mothibi, Nasionale Direkteur van Openbare Vervolgings, het benadruk dat niemand bo die reg verhewe is nie, veral nie diegene wat dit moet toepas nie.
“Die NVG hou al sy beamptes aan die hoogste etiese en professionele standaarde voor. Enige afwyking hiervan sal met die nodige gevolge begroet word.”
Motshabi staan tereg op aanklagte van die oortreding van ‘n beskermingsbevel, kwaadwillige beskadiging van eiendom en aanranding met die doel om ernstig te beseer.
Die saak is tot 7 Mei uitgestel.
LEES OOK: Veroordeelde vryskutjoernalis ‘is nie normaal’ hoor hof voor vonnisoplegging
