OUDTSHOORN – Meiringspoort is Saterdag laatmiddag heropen nadat dit weens oorstromings, rotsstortings en onveilige padtoestande gesluit is. Swartbergpas is steeds vir verkeer gesluit.
Dié sluitings is genoodsaak nadat tussen 40 mm en 80 mm reën tydens ‘n wolkbreuk oor die Matjiesrivier-omgewing uitgesak het. Dit het tot kitsvloede, oorstromings en gevaarlike padtoestande gelei.
Die Wes-Kaapse minister van infrastruktuur, Tertius Simmers, het Saterdag laatmiddag bevestig dat Meiringspoort, tussen Klaarstroom en De Rust, en op die roete tussen Beaufort-Wes en Oudtshoorn, weer vir verkeer oopgestel is. Volgens die departement duur opruimings- en herstelwerk steeds voort, en motoriste word versoek om versigtig deur die poort te ry en alle padtekens en instruksies van amptenare te gehoorsaam.
Swartbergpas tussen Prins Albert en Oudtshoorn bly egter gesluit weens groot rotse wat op die pad beland het, asook gevaarlike, gladde rytoestande weens modder. Die pas sal tot verdere kennisgewing gesluit bly.
Alan Winde, premier van die Wes-Kaap, het die Meiringspoort-omgewing Saterdagoggend besoek. Hy het gesê soek-en-reddingspanne werk reeds sedert Vrydag in die gebied. ‘n Helikopter is ingespan, en mense wat in die passe vasgekeer was, is na veiligheid gebring. Die persone sluit onder meer enkele vragmotorbestuurders, toeriste, en ander motoriste in. Na bewering was ongeveer 50 persone vasgekeer.
Winde het Saterdagoggend gesê opruimingspanne werk van albei kante van Meiringspoort met die doel om dié roete Saterdag reeds oop te stel.
Feesgangers wat die KKNK besoek, wat van 28 Maart tot 4 April in Oudtshoorn plaasvind, asook alle ander padgebruikers, word versoek om padwaarskuwingstekens te gehoorsaam. Wees ook bedag daarop dat spanne wat opruiming doen, steeds in Meiringspoort werksaam is.
Die Swartbergpas sal tot verdere kennisgewing gesluit wees.
In geval van nood kan die Garden Route Noodoproepsentrum by 044 805 5071 geskakel word of via WhatsApp by 081 709 5193.
LEES OOK: Flooding forces three-week closure of Botswana’s Moremi Game Reserve
You must be logged in to post a comment.