Die Hooggeregshof in Kimberley moet weereens ingryp in ‘n bittere stryd tussen die Noord-Kaapse departement van vervoer en veiligheidskakeling, en Ocean Echo Properties (Edms) Bpk van wie hulle ’n gebou gehuur het. Die gebou is weens gebou-veiligheidredes gesluit.
Die jongste hofaansoek wat Vrydag 23 Januarie aangehoor is, kom nadat Ocean Echo ʼn aansoek om verlof tot appèl ingedien het teen ʼn uitspraak en bestraffende kostebevel in die guns van die departement. Dié uitspraak sou die departement toegang tot die gebou gee om finansiële dokumente te verwyder.
Ocean Echo se aansoek om verlof tot appèl het die departement verhinder om die gebou te betree, waarna hulle weer hul jongste aansoek ingedien het.
Die departement van arbeid het die gebou op die hoek van Sydney- en Lennoxstraat in die Diamantstad meer as ‘n jaar gelede weens veiligheidsredes gesluit. Hul ondersoek het ernstige strukturele en ventilasie-gebreke belig, insluitend nie-funksionele lugversorgers en ‘n gebrek aan vensters. Dit is vererger deur ou matte wat ‘n omgewing met gevaarlike en swak luggehalte skep. Die gebou se brandtrap is onstabiel en die departement kan nie verpligte brandoefeninge uitvoer nie.
In sy haas het amptenare van die departement van vervoer meubelstukke en dokumente agtergelaat, wat hulle nou verlang.
‘Dringend noodsaaklik om dokumente te bekom’
Die departement het einde verlede jaar ’n hofbevel in sy guns verkry vir onmiddellike toegang tot die gebou om veral finansiële dokumente te verkry sodat hulle hul finansiële state by die Ouditeur-Generaal (OG) kan indien. Hulle het reeds die vorige finansiële geldjaar se sperdatum misgeloop, en nou dreig ’n tweede jaar van nienakoming van wetlike verpligtinge.
Die advokaat vir die departement het aangevoer dit is dringend noodsaaklik dat hulle hul dokumente uit die gebou kry. Indien hulle weer nie geoudit word nie, kan dit rampspoedige gevolge hê.
Die departement glo hy kan buitengewone omstandighede bewys indien hul statutêre verpligtinge misluk en hulle nie ʼn ouditverslag van die OG kan kry nie.
Volgens die advokaat sal Ocean Echo nie onomkeerbare skade ly nie. Sy het aangevoer hulle gaan nie waardevolle items verwyder nie, en sal selfs fotokopieë van dokumente aanvaar.
Twis bestaan oor uitstaande huurgeld van R40 miljoen
Sy het toegegee ʼn twis bestaan oor uitstaande huurgeld van R40 miljoen, wat ingevolge ʼn afsonderlike hofbevel direk aan die bank betaal moet word. Die departement sê omdat hy nie meer die gebou beset nie, betaal hy ingevolge ʼn ooreenkoms met Nedbank net ʼn sekere bedrag.
Volgens die departement het die langtermyn-huurkontrak tussen die partye verval, en hulle het die gebou op ‘n maand-tot-maand basis beset. Ocean Echo betwis egter die beweerde verval van die langtermyn-huurkontrak en voer aan dat dit outomaties hernu is in ooreenstemming met die toepaslike klousules van die ooreenkoms.
Reeds hangende appèlaansoek oor dieselfde kwessie
Intussen word likwidasie-aansoeke teen Ocean Echo in Mei vanjaar deur twee banke aangehoor.
Adv. Johan Harmse, vir Ocean Echo, voer aan daar is reeds ʼn hangende appèlaansoek oor dieselfde kwessie. Daarom is die departement se aansoek lis pendens, ’n regbeginsel wat beteken “’n hangende geding”.
LEES OOK: Court orders access to building after officials evacuate unsafe building
Dié beginsel moet verhoed dat dieselfde saak tegelykertyd in verskillende howe bereg word, daar botsende uitsprake deur verskillende regters oor dieselfde feitestel gelewer word en regskoste onnodig opgejaag word deur duplisering van regsaksie.
As die regter die departement gelyk gee, sal dit Ocean Echo se appèlaansoek in die wiele ry en sy kliënt onomkeerbare skade ly.
“Ons behou juis die dokumente, want dit is uiters waardevol vir die departement, wat ons ’n voordeel in onderhandelings gee. Geen kopieë sal oorhandig word nie.”
Retensiereg (ook bekend as ‘n lien) is ‘n reg wat aan iemand verleen word wat in besit is van iemand anders se eiendom. Dit laat die persoon toe om die eiendom terug te hou totdat hulle vergoed is vir uitgawes aangegaan of verbeteringe aan die eiendom.
‘Kan nie nou dringendheid aanvoer nie’
Harmse voer aan die departement kon die hof al ʼn jaar gelede met sy aansoeke, insluitend die spoliasie-aansoek wat in 2027 aangehoor word, genader het, maar het nie. Daarom kan hulle nie nou dringendheid aanvoer nie. Die departement moet Nedbank ingevolge die hofbevel ten volle betaal.
Die departement het ieder geval geen nuwe argumente gebring nie as wat in hul vorige aansoek genoem is. Hulle moet net hul kontrak nakom,voer Harmse aan.
Regter Albert Nxumalo het uitspraak voorbehou.
LEES OOK: Social media giants face landmark trial over addiction claims
