Die enigste verhoogstuk van die bekende skrywer, wyle Annelie Botes, is eerskomende Saterdag op die verhoog van die Apollo-teater in Victoria-Wes te sien.

Duiwelsbrood handel oor die dobbelverslawing van ‘n vrou, en dié verslawing lei daartoe dat haar gesin alles verloor. Dit veroorsaak dat haar man dit nie meer kon hanteer nie, haar wegjaag, en sy in ‘n losieshuis beland.

Botes se skryfwerk is voorheen as “onverbiddelik eerlik met opregte menslikheid” beskryf, en dit is ook duidelik in dié verhaal van Hester Verster, ‘n wiskundeonderwyseres wie ná ‘n eerste besoek aan ’n dobbelhuis vasgevang word in sy kloue.

Duiwelsbrood word beskryf as ‘n werklike insig in die lewe, die liefde en pyn van die skepsel genaamd mens.

Emercia de Lange en Vinita Gouws is op die verhoog, en die regie word deur Marlene Pieters behartig.

Dit word na Victoria-Wes gebring deur die ATKV-tak Victoria-Wes, Peaat en die ATKV-tak Peaat, in samewerking met die Apollo-teater. Peaat – die Port Elizabethse Afrikaanse Amateur Toneelvereniging – is die oudste Afrikaanse amateur toneelgroep in Suid-Afrika en is in 1951 gestig om ‘n verhoog vir amateurtoneel in Afrikaans te skep.

• Dit begin om 18:30 en kaartjies kos R100 per persoon.
• Skakel 073 932 0001 of besoek Apollo Theatre Victoria West op Facebook vir meer inligting.

LEES OOK: Lig skyn weer by Noord-Kaap se art deco-teater