Die skool-gemeenskap van Vlottenburg Primêr treur weer nadat nog een van hul leerders vandeesweek oorlede is.

Ruche Basson, ‘n graad tweetjie van die skool buite Stellenbosch, is Dinsdagmiddag (25 Augustus) dood nadat sy vermoedelik onder ‘n trein by Lynedoch beland het.

Stellenbosch-polisie het bevestig beamptes is om 14:18 na die Lynedoch-stasie uitgeroep. Met hul aankoms by die toneel is ‘n 8-jarige meisie onder die trein gevind. Sy is op die toneel deur paramedici dood verklaar. Volgens inligting was Ruche besig om uit die skoolbussie te klim toe sy die treinspoor probeer oorsteek het.

LEES OOK: Schoolboy (12) killed crossing dangerous stretch on Polkadraai Road

Stellenbosch-polisie ondersoek ‘n saak van manslag in verband met die voorval.

Zinobulali Mihi, ‘n woordvoerder van Passasierspooragentskap van Suid-Afrika (Prasa), het gesê die voorval word tans ondersoek en verdere inligting kan dus nie in hierdie stadium gedeel word nie.

Ruche se skool het ‘n boodskap van medely op hul Facebookblad geplaas nadat sy oorlede is. “Met groot hartseer neem ons afskeid van een van ons geliefde leerders. Ons harte is stukkend, en ons gedagtes en gebede is by haar familie, geliefdes, klasmaats en die hele Vlottenburg Primêr, Lynedoch-gemeenskap gedurende hierdie ongelooflik moeilike tyd,” het die skool geskryf.

Die skool het vroeër vanjaar ook ‘n leerder verloor toe Calvin Jansen (12) voor skool doodgery is nadat hy die Polkadraaipad probeer oorsteek het. Calvin is op Woensdag 13 Mei oorlede.