Duisende graad 5-meisies regoor die Wes-Kaap sal nog ‘n geleentheid hê om gratis beskerming teen servikale kanker te ontvang wanneer die provinsie se volgende ronde skoolgebaseerde HPV-inentings volgende maand begin.
Die inentingsveldtog volg op die suksesvolle inenting van 36 841 gr.5-meisies in openbare en spesiale skole gedurende die eerste ses maande van die jaar.
Die Wes-Kaapse regering moedig nou die ouers en versorgers van meer as 14 000 kwalifiserende leerders wat nog nie die entstof ontvang het nie, aan om die vereiste toestemmingsvorms te teken.
LEES OOK: Dokter se studie oor servikale kanker bied hoop vir vroue
Laer risiko
Die Menslike Papillomavirus (HPV)-entstof is wêreldwyd bewys om die risiko van vroue om later in die lewe servikale kanker te ontwikkel, aansienlik te verminder.
Die Wes-Kaapse LUR vir gesondheid en welstand, Mireille Wenger, het ouers en versorgers aangespoor om voordeel te trek uit die gratis inentingsprogram.
“Ouers en versorgers doen elke dag soveel om hul kinders te beskerm, en dit is nog ‘n kragtige manier om jou dogter se toekoms te beskerm. Met een getekende toestemmingsvorm kan jy haar toegang gee tot ‘n gratis entstof wat kan help om ‘n kanker te voorkom wat haar lewe oor baie jare kan bedreig.
“Byna 37 000 gesinne het reeds ja gesê vir daardie beskerming, en ek moedig elke in aanmerking komende ouer en versorger aan om dieselfde te doen.”
Tussen Maandag 3 Augustus en Wonesdag 23 September sal verpleegsters van die departement van gesondheid en welstand privaat-, openbare en spesiale skole besoek om gratis enkeldosis- en inhaal-HPV-entstowwe aan graad 5-meisies van nege jaar en ouer, wat in aanmerking kom, toe te dien.
Die departement sê servikale kanker is die tweede mees algemene kanker wat onder Suid-Afrikaanse vroue gediagnoseer word. Dit word dikwels deur HPV veroorsaak.
Hupstootinspuiting
Die entstof word gedurende vroeë tienerskap toegedien, wanneer kinders ‘n sterk immuun het, wat dit op die lang termyn hoogs effektief maak.
Die skoolinentingsprogram sal ook Tetanus-, Difterie- en Kinkhoes-hupstootinspuitings (TDaP) insluit vir alle graad 5-seuns en -meisies wat openbare en privaatskole bywoon.
Die hupstootinspuiting help om sakke van difterie-uitbrake te voorkom, skoolgebaseerde inentingsprogramme te versterk en beskerming teen tetanus, difterie en kinkhoes te hernu namate immuniteit van vroeë kinderjare begin vervaag.
Die departement beklemtoon dat entstowwe slegs toegedien sal word aan leerders wie se ouers of versorgers die toestemmingsvorms onderteken en terugbesorg het.
Wenger het erken dat ouers en versorgers vrae oor inentings mag hê en het hulle aangemoedig om betroubare inligting te soek.
“Praat met ons skoolgesondheidspanne of besoek jou plaaslike kliniek. Ons wil hê jy moet vol vertroue voel oor die besluit wat jy vir jou kind neem. Vra jou kind of hulle hul toestemmingsvorm ontvang het en teken dit asseblief en stuur dit terug.”
Vir meer inligting oor kindergesondheid en immunisering, besoek: https://www.westerncape.gov.za/health-wellness/article/child-health-and-immunisation.
LEES OOK: Inenting kan servikale kanker keer
