Stellenbosch FC het ‘n opskudding in die dorp veroorsaak ná die aankondiging dat die Bafana Bafana-doelskieter Ashley du Preez ‘n permanente ooreenkoms met die klub onderteken het.

Du Preez is in Idasvallei gebore en getoë, en keer terug na Stellenbosch waar hy sy professionele loopbaan as ‘n 19-jarige in 2016 begin het.

Hy het 98 verskynings tydens sy eerste tydperk by die Maroons gemaak en was lid van die span wat gehelp het dat die span in 2019 na die Betway Premiership bevorder word.

LEES OOK: Stellenbosch FC honours season’s top performers at awards ceremony

‘Ongelooflike gevoel’

Du Preez het die Kaapse Wynland-klub verlaat om in 2022 by Kaizer Chiefs aan te sluit, waar hy die afgelope vier seisoene gespeel het en ‘n Nedbank-bekerwennersmedalje verower het, voordat hy vroeër vandeesmaand sy langverwagte terugkeer na Stellenbosch gemaak het.

“Ek het altyd geweet dat ek na Stellenbosch sou terugkom,” het die 29-jarige in ‘n verklaring gesê. Dit is wonderlik om terug te wees waar ek grootgeword het en by die klub waar alles vir my begin het, en om weer deel van die Stellenbosch-familie te wees.

“Die gemeenskap ken my goed en het my sedert die begin van my professionele loopbaan ondersteun, so om ‘n plaaslike speler te wees en weer die klub te verteenwoordig, is vir my ‘n groot eer en voorreg. Dit is ‘n ongelooflike gevoel om terug te wees.”

Stellenbosch FC het ook onlangs die plaaslike duo Luthando Vena en Keanan Johannesen met hul eerste professionele kontrakte beloon nadat die paar uit die klub se reserwespan gegradueer het.

Beide Vena en Johannesen, onderskeidelik van Kayamandi en Jamestown, het dié seisoen tot die eerste span gevorder en hul onderskeie debute in die klub se openingsdag-wedstryd teen AmaZulu op Saterdag 1 Augustus gemaak.

Eerste twee wedstryde

Die Maroons het hul openingsligawedstryd wat by Sugar Ray Xulu-stadion in Durban gespeel is, met 1-0 verloor.

Hulle was weer Dinsdagaand (11 Augustus) in liga-aksie teen Polokwane City in die Seshego-stadion, en het hul eerste punt op die punteleer van die 2026-’27-veldtog in ‘n 3-3 gelykopwedstryd opgeraap.

In hul 300ste ligawedstryd het die Stellenbossers diep gegrawe om die wedstryd gelykop te maak, met Du Preez wat sy tweede debuut van die reserwebank af gemaak het en sommer onmiddellik ‘n impak met sy eerste raak aan die bal gemaak het.

Dit het sy span opnuut in aanmerking gebring vir ‘n deel van die buit.

Stellies se volgende liga-uitstappie is op Vrydag 14 Augustus, wanneer hulle Marumo Gallants in die Athlone-stadion om 19:30 ontvang.

LEES OOK: ABC Motsepe League beckons for Kayamandi’s dominant ‘Net Boys’