Macassar is ‘n brandpunt vir kragboksaanvalle, het Eskom bevestig, nadat vier voorvalle die afgelope weke aangemeld is.

Die jongste was op Dinsdag 21 Julie toe ‘n kragboks in Irisweg aan die brand gesteek is en inwoners drie dae sonder krag was. ‘n 19-jarige is in hegtenis geneem (“Tiener vas oor brand van kragboks,” DistriksPos & Helderberg Gazette, 29 Julie).

Felicia Brains, ‘n woordvoerder vir Eskom, het gesê ‘n toename in soortgelyke voorvalle is in die Macassar-gebied ervaar.

Die polisie se taakspan vir noodsaaklike infrastruktuur doen ‘n eksterne ondersoek, terwyl Eskom ook sy eie doen. Brains kon nie vasstel of die voorvalle met koperdiefstal verband hou nie. Die ondersoeke sal die motief vasstel en bepaal of dit verband hou met koperdiefstal of ander misdadige aktiwiteite by kritieke infrastruktuur. Die volle omvang word nog bepaal en Eskom kon nie sê wat die skade beloop nie.

“Eskom veroordeel alle vanda­lisme, diefstal en skade aan infrastruktuur. Hierdie aktiwiteite lei nie net tot duur herstelwerk nie, maar raak ook gemeenskappe deur die elektrisiteitsvoorsiening te ontwrig en dienslewering te benadeel,” het Brains gesê.

Sy het bygevoeg Eskom hersien voortdurend maatreëls om sy infrastruktuur te beskerm. Weens veiligheidsoorwegings kan Eskom nie spesifieke maatreëls bekendmaak nie. Hy werk egter steeds saam met wetstoepassing en ander belanghebbendes om misdade wat met infrastruktuur verband hou, te ontmoedig.

“Eskom doen ‘n beroep op die publiek om enige verdagte aktiwiteite wat met elektrisiteits­infrastruktuur verband hou by die polisie of deur Eskom se aanmeldingskanale aan te meld. Gemeenskapsondersteuning bly noodsaaklik in die stryd teen misdaad wat op infrastruktuur gemik is.”