Verligting het gevolge vir staatsinkomste
Prof. Jannie Rossouw, ’n ekonoom en die voormalige hoof van die Universiteit van die Witwatersrand se sakeskool, sê die inkomste uit die Padongelukfondsheffing (POF) word spesifiek vir dié fonds geoormerk.
Die algemene brandstofheffing word daarenteen nie vir ’n spesifieke doel eenkant gesit nie. Volgens Rossouw betaal die SAID dié geld aan die staat se Nasionale Inkomstefonds.
“Aanvanklik was die idee dat die brandstofheffing gebruik sou word vir vervoer- en padverwante doeleindes, maar dis nie tans die beleid van die Suid-Afrikaanse regering nie. Of hierdie geld spesifiek vir vervoer- en padverwante doeleindes aangewend moet word, is iets waaroor debat gevoer kan word.
“Vir my het dit egter logies sin dat die brandstofheffing en ander vorme van belasting gebruik moet word vir die bestedingsprioriteite van die staat in die geheel.”
Wayne Duvenage, die uitvoerende hoof van die Organisasie teen Belastingmisbruik (Outa), waarsku dat die oplossing vir Suid-Afrika se brandstofkrisis nie bloot daarin lê om die POF-heffing op petrol en diesel af te skaf nie. Volgens hom moet die fonds se bestuur en besteding eerder reggestel word voordat daar oor ’n nuwe manier van finansiering besluit word.
- Lees die volledige artikel oor dié kwessie in Die Papier, wat nou op die rakke is.
- Huisaflewering is ook beskikbaar deur On the Dot te e-pos by diepapierintekening@onthedot.co.za of te bel by 087 353 2191.
- ’n Elektroniese koerant kan ook gekoop word by op novanews.co.za/diepapier of by Magzter.