Die Lions het hul Verenigde Rugbykampioenskap-seisoen met ’n oorwinning begin toe hulle die verdedigende kampioen, Leinster, Saterdag in Johannesburg met 27-26 geklop het.
Dit was ’n welverdiende oorwinning, met die Lions wat goeie ondernemingsgees en soms uitstekende verdediging gewys het.
Leinster het egter verroes gelyk, met verskeie onkarakteristieke hanteringsfoute en talle strafskoppe wat teen hulle toegeken is.
Leinster het goed begin en die Lions in die eerste minute onder druk geplaas. Die druk het voortgeduur ná ’n skrumstraf, gevolg deur nog ’n oortreding toe die Lionsvir onkant gestraf is.
Uit die daaropvolgende vinnige tikskop het skrumskakel Fintan Gunne naby die doellyn ingesny en in die sewende minuut oor die doellyn gedruk om Leinster met 5-0 te laat voorloop.
Die Lions het feitlik onmiddellik teruggeslaan nadat Leinster die bal vorentoe geslaan het met die afskop.
Die tuisspan het die daaropvolgende skrum oorheers, waarna vleuel Erich Cronjé met ’n briljante binnelyn deurgebreek en ’n drie onder die pale gedruk het. Chris Smith se doelskop het die Lions in die 10de minuut met 7-5 laat voorloop.
Die Lions was kort daarna weer op die aanval en, met Leinster wat geskarrel het om hul verdediging te organiseer, is die besoekers vir onkant gestraf.
Smith het die strafskop deur die pale gestuur om die Lions in die 13de minuut met 10-5 voor te sit.
Die tempo het deur die eerste kwart van die wedstryd hoog gebly en Leinster het weer die voortou geneem toe Josh Ericson deur die tuisspan se middelveldverdediging gesny het voordat hy die bal na Gunne aan sy binnekant gespeel het.
Die skrumskakel het weggesnel en onder die pale gedruk. Gabriel se doelskop het Leinster in die 15de minuut met 12-10 laat voorloop.
Cronjé het homself as ’n doring in Leinster se vlees bewys en in die 25ste minuut ’n briljante agterlynbeweging afgerond om die Lions met 17-12 te laat voorloop.
Dit het begin met ’n deurbraak deur Henco van Wyk, wat Boeta Chamberlain aan sy buitekant gevind het. Die heelagter het die laaste verdediger getrek voordat hy Cronjé weggestuur het vir ’n drie wat deur Smith verdoel is.
Leinster het egter met ’n voorsprong van 19-17 rustyd toe gegaan nadat Gunne sy driekuns voltooi het. Weer eens het die Lions se verdediging uit die eerste fase hulle in die steek gelaat toe Gabriel deurgebreek het voordat hy die bal na die No. 9 aan sy binnekant gespeel het vir ’n drie wat deur Gabriel verdoel is.
In die eerste 20 minute van die tweede helfte het albei spanne geleenthede op die aanval gehad, maar swak besluite en hanteringsfoute, tesame met uitstekende verdediging, het die telling onveranderd gehou.
Die Lions het in die 60ste minuut weer die voortou geneem danksy ’n strafskop deur Smith, wat die telling 20-19 in die tuisspan se guns gemaak het.
Die Lions het die wedstryd twee minute voor die einde beklink toe Smith met ’n kruisskop vir Mpeku gevind het. Die vleuel het geen fout gemaak nie en in die hoek gedruk om deur Leinster se verdediging te breek.
Leinster het wel deur Charlie Tector ’n drie gedruk, maar dit was te min en te laat.
Punte
Lions 27 (17)
Drieë: Erich Cronjé (2), Kelly Mpeku
Doelskoppe: Chris Smith (3)
Strafskoppe: Chris Smith (2)
Leinster 26 (19)
Drieë: Fintan Gunne (3), Charlie Tector
Doelskoppe: Caspar Gabriel (3)