Amerika het reeds ’n lys Suid-Afrikaanse amptenare wat ingevolge Washington se nuwe visumbeperkings toegang tot Amerika geweier kan word, het Leo Brent Bozell III, die Amerikaanse ambassadeur in Suid-Afrika, bevestig.
“Daar is ’n lys,” het Bozell Woensdag in ’n onderhoud met Die Papier gesê.
“Hulle weet wie hulle is . . . en hulle sal – wanneer hulle na Amerika wil kom – uitvind dat hulle nie welkom is nie.”
Hy sê Amerikaanse wetgewing verbied hom om name bekend te maak.
Marco Rubio, Amerika se minister van buitelandse sake, het op 15 September visumbeperkings op Suid-Afrika aangekondig, wat die toegang van mense, wat volgens die VSA betrokke is by rasgebaseerde diskriminasie in die land, die aanhitsing van geweld teen minderheidsgroepe of wat grond sonder vergoeding onteien, beperk.
Hoe kom jy op die lys?
Volgens Bozell is dit op staatsamptenare gemik – “nie jou gewone mens nie” en op diegene wat volgens Washington “sistemies en sistematies” geweld teen minderheidsgroepe aanhits.
Bozell se bevestiging dat so ’n lys reeds bestaan, kom te midde van ’n veel breër stel Amerikaanse eise aan Pretoria, wat uit vyf eise oor binnelandse beleid en belegging én nog agt afsonderlike eise oor Suid-Afrika se buitelandse beleid bestaan.
- Lees die volledige artikel oor dié onderhoud in Die Papier, wat nou op die rakke is.
- Huisaflewering is ook beskikbaar deur On the Dot te e-pos by diepapierintekening@onthedot.co.za of te bel by 087 353 2191.
- ’n Elektroniese koerant kan ook gekoop word by op novanews.co.za/diepapier of by Magzter.