WESKUS – Die Departement van Bosbou, Visserye en die Omgewing ondersoek steeds die oorsaak van wydverspreide sardynvrektes langs die Wes-Kaapse kus, terwyl nuwe berigte van uitgespoelde vis en ander seelewe steeds inkom.

Die departement het vroeër bevestig dat die verskynsel voorkom vanaf Saldanha aan die Weskus tot by Gansbaai in die Overberg. Benewens sardyne wat op strande uitspoel, is dooie en sterwende vis ook tot agt seemyl vanaf Houtbaai op die see waargeneem.

Foto’s, video’s en verslae van vissers en lede van die publiek is aan die departement gestuur om die ondersoek te ondersteun.

Die eerste vismonsters, wat die afgelope naweek naby Saldanha deur die vissersboot Shivon versamel is, is reeds getoets, terwyl navorsers voortgaan om die moontlike oorsake en omvang van die vrektes te bepaal. Teen druktyd het die departement nog geen verdere inligting oor die uitslae of moontlike oorsaak bekend gemaak nie.

‘n Skadelike algebloei wat tans in die Saldanhabaai-gebied voorkom, word as een van verskeie moontlike oorsake ondersoek. Omgewingsfaktore, vissiektes en gifstowwe word egter ook in die ondersoek oorweeg.

Intussen is groot hoeveelhede planktonkrefies (krill) die afgelope paar dae op strande by St. Helenabaai aangetref. Video’s en foto’s wys hoe seemeeue op die uitgespoelde kril toesak. Dit is nog onbekend of dié verskynsel met die sardynvrektes verband hou.

Weslander het ook foto’s ontvang van sardyne wat op Silversands-strand in Bettiesbaai uitgespoel het. Die foto’s is deur inwoner Pete Oxford geneem en dui daarop dat die verskynsel oor ‘n groot deel van die Wes-Kaapse kus voorkom.

Die departement versoek die publiek om nie dooie vis op strande of in die see te hanteer of te eet nie, totdat die oorsaak van die vrektes vasgestel is. Navorsers doen steeds ondersoek na die ongewone mariene verskynsel.